"Çox təəssüf hissi ilə qeyd etmək istəyirəm ki, bütün bu hadisələrdən, itkilərdən sonra hələ də bir çox vətəndaşlarımız koronovirusu ciddiyə almırlar. Əvvəllər yoluxma halları əsasən Bakı və digər böyük şəhərlərdə müşahidə olunurdusa, son zamanlar reqionları da əhatə edir". Bunu SİA-ya millət vəkili Nəsib Məhəməliyev deyib.

Onun sözlərinəgörə, Nazirlər Kabineti yanında Operativ Qərargahın kifayət qədər yumşaq karantin tədbirləri tətbiq etməsinə baxmayaraq, bəzi insanlar ictimai yerlərdə sosial məsafə gözləmədən, maskasız davranmaqla virusun daha sürətlə yayılması üçün münbit şərait yaratmış oldular: "Cərimələrin artırılmasına gəldikdə isə, əgər görülən tədbirlər kifayət qədər effektiv olmasa, təbii ki, itkilərin qarşısının alınması üçün belə addım atıla bilər. Mövcud vəziyyətdə əhalinin əksər hissəsi hökumətdən pandemiyanın qarşısının alınmasını və normal həyata şəraitinin bərpasını arzulayır. Problemin həlli vətəndaş həmrəyliyindən, karantin qaydalarına ciddi əməl etməkdən keçir".