FLAŞ
» » Biz komfort zonamızı tərk etdiyimiz andan daha çox öyrənməyə başlayırıq

Biz komfort zonamızı tərk etdiyimiz andan daha çox öyrənməyə başlayırıq


- Şamil bəy, özünüz haqqında qısa məlumat verə bilərsiniz?

Orta təhsilimi Balakən rayonu Yeni Şərif kənd tam orta məktəbində almışam. Məktəb illərində xəyalım müasir təhsil sisteminə uyğun ali məktəbdə oxumaq olub. “İnsanlar düşündüklərini yaşayarlar” deyilir. Məndə də bu baş verdi. İxtisas seçimindən cəmi bir neçə saat əvvəl əlimə müasir təhsil verən bir universitetin məlumat blankı keçdi. Universitet və ixtisaslarla tanış oldum və dəqiqələr ərzində seçimimi etdim. İndiki adı ilə Bakı Mühəndislik universitetinə (keçmiş Qafqaz Universiteti) qəbul oldum. Bakalavrı bitirdikdən sonra həmin universitetdə sənaye mühəndisliyi ixtisası üzrə magistr dərəcəmi tamamladım.Həmçinin, seçimimdə valideynlərimin çox böyük dəstəyini gördüm.

İş həyatıma sənaye mühəndisliyi üzrə davam etdim və artıq 10 ildən artıqdır ki, layihə planlama və layihələrə nəzarət mühəndisi kimi yerli və xarici şirkətlərdəçalışıram. İşlədiyim şirkətlər arasında Socar, Akkord, Technip İtaliya, JOCAP kimi şirkətlət yer alır.
İşdən əlavə şəxsi layihələrim də var. Bunlara Mentor Talks, Mentor Academy aiddir. Bu layihələrin rəhbəri olaraq əsas məqsədimiz gənclərə motivasiya vermək, onlarda inkişaf qığılcımları yaratmaqdır.

-Necə oldu ki, yolunuz Planlama sahəsindən keçdi?


İlk öncə bu marağım universitetdə bizə tədris olunan “Layihələrin planlaşdırılması və idarə edilməsi” dərsi ilə yaranıb. Bu sahə diqqətimi çəkdiyi üçün daimi araşdırmalar aparırdım. Bu axtarışlarım nəticəsində iş dünyasında planlama sahəsində ən yaxşılardan biri olan və mənə mentor rolunu oynamış Mikayıl Rəhimovla qarşılaşdım.Daha sonra onunla birlikdə bu sahədə inkişaf edərək “Layihə planlaşdırma və layihələrə nəzarət” üzrə öz şirkətimizi təsis etdik - “Gantt Training & Consulting”. Hal-hazırda burada Azərbaycanın aparıcı şirkətlərinin əməkdaşlarına təlim və konsultasiya veririk.

Onu deyə bilərəm ki, planlama genişmiqyaslı və innovativ sahədir. Çalışıram daim öz üzərimdə işləyim və daha çox inkişaf edim. Bu sahədə Fransada təlimlər almışam. Həmçinin PMP beynəlxalq layihə idarəetmə sertifikasiyasını əldə etmişəm.

- Rayondan Bakıya getdiyiniz zaman hansı çətinliklərlə qarşılaşdınız?


Əlbəttə ki, kənd və şəhər həyatının fərqləri çox böyükdür. Ən böyük çətinlik ilk vaxtlarda “kənd uşaqlarının” “şəhər uşaqlarına” ayaqlaşması məsələsi olur.

Buna kommunikasiya deyərdim. Bunu həll etdikdən sonra hər şey zəncirvari düzəlir.

Məncə qarşılaşdığımız hər çətinlik bizə yeni nələrisə öyrədir. Yanaşmam belədir: çətinlik yox, öyrənmə fürsəti. Biz komfort zonamızı tərk etdiyimiz andan daha çox öyrənməyə başlayırıq. Əsas odur, bu fürsəti dəyərləndirməyi bacaraq.

-Sizin haqqınızda danışarkən tez-tez Mentor Talks layihəsinin də adı çəkilir. Bu layihə necə ərsəyə gəlib?


Təbii ki, yeni bir fikir qəflətən peyda olmur. Şüaraltında biz o haqda düşünürük və beləliklə o, bizi tapır.

Puşkin hər zaman üzərində kağız və qələm daşıyarmış. Hətta gecələr də. O bunu yeni fikirləri unutmadan qələmə almaq üçün edirdi. Yoxsa onlar kəpənək kimi uçub gedir. Mentor Talks ideyam da gözləmədiyim bir anda gəlmişdi. Əlimin altında sadəcə bir salfet var idi. Tez qeyd etdim, sonra fikirlər böyüdü, artdı və böyük bir layihəyə çevrildi. 

Mən hər zaman insanların motivasiyaya ehtiyacı olduğunu düşünürəm. Xüsusilə, başqa şəxslərin dilə gətirdiyi hekayələr məncə insan həyatına müsbət təsirlər göstərir. Bu düşüncələr daim beynimdə gəzirdi. Mentor Talks da bu düşüncələrin məhsuludur. Bu layihənin əsas məqsədi insanların həyatına müsbət toxunuşetməkdir. Bu günə qədər 3 Mentor Talks tədbiri təşkil etmişik və ümumilikdə 1000 nəfərə yaxın insan bu tədbirlərdə iştirak edib.Spikerlərin ilham verən çıxışlarını YouTube platformasında da yerləşdirmişik, burada maraq və izlənmə sayı kifayət qədər çoxdur.
Ən çox sevindiyim məqam isə çıxışlardan təsirlənən iştirakçıların həyatında olan müsbət dəyişikliklərdir.

-Bitirdiyiniz məktəb üçün təqaüd proqramı da təşkil etmisiniz. Bu haqda məlumat verə bilərsiniz?


Bəli, ucqar kənd məktəbində məşhur Harvard və Stanford nümunəsi yaratmışıq. Bir qrup orta məktəb məzunları və müəllimlərlə birlikdə Rauf Hədisov adına təqaüd fondu və müsabiqəni təşkil etmişik. İldə 2 dəfə məktəbdə dəyərləndirmə imtahanı keçirilir və ən yaxşı nəticə əldə etmiş şagirdlər təqaüdə layiq görülür. Onlar həmçinin kəndimizin şəhidi Rauf Hədisovun şəklini əks etdirən döş nişanını daşıyırlar.

Bu proqram məktəblilərin inkişafına dəstək məqsədi daşıyır. Hər il şagirdlərin daha çox həvəsli olduqlarının, daha çox oxuduqlarının şahidi oluruq. Təqaüd proqramı həm də şagirdlərdə rəqabəti, çalışmağı gücləndirir. Əldə etdiyimiz nəticələr proqramın çox effektiv keçdiyinin göstəricisidir.
Rauf Hədisov adına təqaüd proqramı mənim oxuduğum illərdə də təşkil edilirdi. Həmin illərin döş nişanını indi də saxlayan dostlarımız var. Bir müddət fasilədən sonra biz bu proqramı yenidən başlatdıq. Bütün məktəblərdə belə təşəbbüslərin göstərilməsini arzulayırıq.


-Nələrdən motivasiya alırsınız?

Əsasən özümdə gördüyüm inkişafı hər zaman motivasiya mənbəyi olaraq istifadə etmişəm. Dünənki mən və bugünkü mən arasındakı fərq insanı daha çox inkişafa sürükləyir.

Bildiklərimi insanlarla paylaşmaqdan, onların daha yaxşı vəziyyətə gəlməsindən motivasiya alıram. Kimlərinsə üzərində müsbət təsirimi görmək məni daha çox həvəsləndirir. İnkişaf və motivasiya – hər ikisi bir-birinə təkan verir. 

- Gənclərə nə kimi tövsiyələriniz var? Onlara hansı 3 kitabı tövsiyə edərdiniz?


Özlərini düzgün qiymətləndirməyi tövsiyə edərdim. Güclü tərəflərini tapıb, ona uyğun bir həyat yolunu seçməyi, çoxlu oxumağı, öyrəndiklərini tətbiq etməyi.

Düşünürəm ki, bunlarla nəticə əldə edəcəklər və şəxsi uğurları artan silsilə ilə davam edəcək.

Oxumalı olduqları kitablar isə kifayət qədər çoxdur. Düşünürəm ki, həyatın hər dönəmində oxumalı olduğumuz fərqli kitablar var. Məsələn, məktəblilər bədii ədəbiyyat və motivasiya kitablarına üstünlük verə bilərlər. Tələbələr üçün isə şəxsi inkişaf, psixologiya, seçəcəkləri peşəyə aid kitablar daha uyğundur. Məhz 3 kitabı vurğulamalı olsam, bunları tövsiyə edirəm: KVAN (Coşqun Kərimov),TED kimi danış (Kris Anderson), Atomik Vərdişlər(Ceyms Klir).

Balaken.info
İbrahim Şıxməmmədov

Balakəndə koronavirus xəstəsi iş yerində aşkarlanıb - FOTO