Sentyabrın 15-də Balakən rayonunun Bedağar kənd tam orta məktəbi üçün inşa olunan 2 mərtəbəli, 180 şagird yerlik yeni bina istifadəyə verilib.

Açılış mərasimində Elm və Təhsil Nazirliyinin nümayəndələri, rayon icra hakimiyyətinin məsul əməkdaşları, təhsil işçiləri, valideynlər, şagirdlər və kənd sakinləri iştirak ediblər.

Tədbirdə Ulu Öndər Heydər Əliyevin və şəhidlərin əziz xatirəsi bir dəqiqəlik sükutla yad olunub, Dövlət Himni səsləndirilib.

Çıxış edənlər müəllim, şagird və valideynləri yeni tədris ilinin başlanması və təhsil müəssisəsinin istifadəyə verilməsi münasibətilə təbrik edib, təhsil sahəsində əldə olunan uğurlardan, Prezident İlham Əliyevin və Birinci vitse-prezident Mehriban xanım Əliyevanın bu sahədə gördüyü ardıcıl tədbirlərdən bəhs ediblər. Ölkəmizdə təhsilə verilən önəmdən, təhsil ocaqlarının maddi-texniki bazasının gücləndirilməsinə yönəldilən mühüm tədbirlərdən söz açaraq pedaqoji kollektivi tədrisin keyfiyyətini daha da yaxşılaşdırmağa, şagirdləri biliklərə daha əzmlə yiyələnməyə çağırıblar. Təhsil işçiləri onlara göstərilən yüksək dövlət qayğısına görə ölkə Prezidenti cənab İlham Əliyevə və Birinci vitse-Prezident Mehriban xanım Əliyevaya minnətdarlıqlarını ifadə ediblər.

Yeni məktəb binasında 20 sinif otağı, fizika və kimya laboratoriyaları, informatika və texnologiya kabinetləri, kitabxana, akt və idman zalları, həmçinin digər zəruri otaqlar yaradılıb.

Qeyd edək ki, 2026–2027-ci tədris ilində məktəbdə 140 şagird təhsil alır, 29 nəfər pedaqoji işçi çalışır.

Şahidi olduğunuz hadisələri çəkib bizə göndərin! 7/24 whatsapp