Balakən rayonunda 44 günlük Vətən müharibəsində şəhid olmuş Fuad Şabanov və Əhməd Mollaçiyevin xatirəsi ehtiramla yad edilib.

Balaken.info xəbər verir ki, oktyabrın 26-da şəhidlərin məzarları ziyarət olunub, önünə gül dəstələri düzülüb və ruhlarına dualar oxunub.

Anım mərasimlərində Balakən Rayon İcra Hakimiyyətinin başçısı Natiq Ağayev, rayonun hüquq mühafizə orqanlarının rəhbərləri, dövlət qurumlarının nümayəndələri, Balakən Rayon Ağsaqqallar Şurasının sədri, şəhid valideynləri, qazilər və rayon ictimaiyyətinin nümayəndələri iştirak ediblər.

Mərasimlərdə Fuad Şabanov və Əhməd Mollaçiyevin vətənpərvərliyindən, döyüşlərdə göstərdikləri şücaətdən bəhs olunub. Vətən qarşısında borclarını ləyaqətlə yerinə yetirərək şəhidlik zirvəsinə ucalan qəhrəmanlarımızın əziz xatirəsinin xalqımız tərəfindən daim ehtiramla yad edildiyi vurğulanıb.

Şəhidlərin valideynləri hər zaman onlara göstərilən diqqət və qayğıya görə Azərbaycan Respublikasının Prezidenti cənab İlham Əliyevə və Birinci vitse-prezident Mehriban xanım Əliyevaya minnətdarlıqlarını bildiriblər.

Qeyd edək ki, Fuad Şabanov 11 iyul 1997-ci ildə Balakən rayonunun Qaravəli kəndində anadan olub. 2003-2014-cü illərdə Ə.Şirinov adına Qaravəli kənd tam orta məktəbində təhsil alıb.

Fuad Şabanov 2020-ci il sentyabrın 27-də başlayan Vətən müharibəsi zamanı Cəbrayıl və Füzuli rayonları istiqamətində gedən döyüşlərdə iştirak edib. O, 25 oktyabr 2020-ci ildə Füzuli rayonu istiqamətində gedən döyüşlər zamanı qəhrəmancasına şəhid olub. Fuad Şabanov Qadaşbinə kənd qəbiristanlığında dəfn edilib.

Azərbaycan Respublikasının Prezidenti cənab İlham Əliyevin müvafiq Sərəncamları ilə Fuad Şabanov ölümündən sonra “Vətən uğrunda”, "Cəbrayılın azad olunmasına görə", “Füzulinin azad olunmasına görə” və "Cəsur döyüşçü" medalları, eləcə də 3-cü dərəcəli “Vətənə xidmətə görə” ordeni ilə təltif edilib.

Şəhid Əhməd Mollaçiyev isə 2 noyabr 1997-ci ildə Balakən rayonunun Püştətala kəndində anadan olub. 2004-2013-cü illərdə Ə.Şirinov adına Qaravəli kənd tam orta məktəbində təhsil alıb.

Əhməd Mollaçiyev 2020-ci il sentyabrın 27-də başlayan Vətən müharibəsi zamanı Cəbrayıl və Füzuli rayonları istiqamətində gedən döyüşlərdə iştirak edib. O, 25 oktyabr 2020-ci ildə Füzuli rayonu istiqamətində gedən döyüşlər zamanı qəhrəmancasına şəhid olub. Əhməd Mollaçiyev Mollaçıbinə kənd qəbiristanlığında dəfn edilib.

Azərbaycan Respublikasının Prezidenti cənab İlham Əliyevin müvafiq Sərəncamları ilə Əhməd Mollaçiyev ölümündən sonra “Vətən uğrunda”, "Cəbrayılın azad olunmasına görə", “Füzulinin azad olunmasına görə” və "Cəsur döyüşçü" medalları, eləcə də 3-cü dərəcəli “Vətənə xidmətə görə” ordeni ilə təltif edilib.

Allah bütün şəhidlərimizə rəhmət eləsin!

Şahidi olduğunuz hadisələri çəkib bizə göndərin! 7/24 whatsapp