FLAŞ
» » Qurtuluş Günü Azərbaycanın bütün uğurlarının başlanğıcıdır

Qurtuluş Günü Azərbaycanın bütün uğurlarının başlanğıcıdır


    Son yüz ildə müstəqil və demokratik dövlətçilik yolunda əzmlə mübarizə aparan Azərbaycan xalqının milli təqvimində bir sıra günlər vardır ki, əbədi olaraq yaddaşımıza silinməz izlər buraxıb. 15 İyun-Milli Qurtuluş Günü bu təqvimdə özünəməxsusluğu ilə seçilir və əbədiyyətə qədər xalqımızın qəlbində yaşayacaqdır.

    Qədim dövlətçilik ənənələrinə malik olan Azərbaycan xalqı uzun müddətdən sonra –1991-ci ilin oktyabrında öz müstəqilliyinə yenidən qovuşsa da, müstəqilliyin ilk illərində həm siyasi hakimiyyətdə, həm də dövlətin bütün təsisatlarında bir boşluq, yerlərdə isə mərkəzi hakimiyyətə inamsızlıq hökm sürürdü. Yaranmış fürsətdən istifadə edən bəzi silahlı dəstələrin yol verdikləri başıpozuq hərəkətlər Azərbaycanın daxilində qardaş qırğını və vətəndaş müharibəsinə zəmin yaradırdı. Ayrı-ayrı bölgələrdə separatçılıq və parçalanma meyillərinin baş qaldırması, bütövlükdə, Azərbaycanın bir dövlət kimi varlığına son qoyulması planını tam gücüilə reallaşdırmağa hesablanmışdı. Bütün bunların fonunda Ermənistanın Azərbaycanın ərazi bütövlüyünə təcavüz edərək daxili və hərtərəfli xarici dəstəklə həyata keçirdiyi işğalçılıq siyasəti vəziyyəti daha da gərginləşdirirdi. Belə bir çətin vəziyyətdə – 1993-cü il iyunun 15-də müstəqil  Azərbaycanın müasir tarixində yeni bir mərhələnin başlanğıcı olan parlaq səhifə açıldı. Azərbaycan xalqı müdriklik göstərdi və 1993-cü ildə – vətəndaş müharibəsi ərəfəsində ulu öndər Heydər Əliyevə müraciət etdi.

    Ulu Öndər Heydər Əliyev xal¬qın təkidli tələbi ilə Bakıya gəldi, iyunun 15-də Azərbaycan Respublikası Ali Sovetinin Sədri seçildi. Ulu Öndərin müdrikliyi, cəsarəti, millətə olan məhəbbəti və xalqın ona olan inamının nəticəsində Azərbaycan o böhranlı vəziyyətdən çıxa bildi.
 
    Xalqımızın təkidli xahişlə heç kimə deyil, məhz ulu öndər Heydər Əliyevə müraciət etməsi, yalnız bu dahi şəxsiyyətə güvənməsi də Qurtuluş Gününün milli məsələ, qürur və ləyaqət məsələsi olduğundan xəbər verirdi. Bütün bu məfhumların simvolu isə dahi şəxsiyyət, məhz xalq qarşısında etdiyi əməllərə görə ümummilli lider adını qazanan Heydər Əliyevdir.

1993-cü ildən sonra xalqımız nicat tapdı. 15 İyun Azərbaycanın bugünkü reallıqlarının təməlində dayanır, məhz ulu öndər tərəfindən formalaşdırılan siyasət bizi bu günə çatdırdı. 1993-2003-cü illər Azərbaycan tarixinə dirçəliş, inkişaf illəri kimi daxil oldu. Düşünülmüş və uzaqgörən siyasət nəticəsində Azərbaycan dövləti iqtisadi və siyasi böhrandan çıxmış oldu və ölkəmizin müstəqilliyi dönməz xarakter aldı. 

    Heydər Əliyev sadəcə, yoxdan dövlət yaratmadı, bu dahi insan həm də xalqımızın tarixini yaratdı. Azərbaycanın memarı Heydər Əliyev, əsərin adı isə Azərbaycan oldu. Tarix yazmağı da, ta¬rix yaratmağı da Heydər Əliyev bacardı.

    Ulu Öndər Heydər Əliyev 15 iyunda Azərbaycana ikinci dəfə siyasi hakimiyyətə qayıdışı ilə, ilk növbədə, ölkədə sabitliyi təmin etdi, dövlətçiliyimizi parçalanmaq və məhv olmaq təhlükəsindən, iqtisadi tənəzzüldən, beynəlxalq təcriddən xilas etdi. 15 İyun təkcə dövlətçiliyimizin xilası deyildi, həm də 44 günlük müharibədə möhtəşəm qələbənin təməli idi. 

    Yeni çağırışlar nəticəsində yara¬nan yeni vəzifələrə cənab Prezident İlham Əliyevin çevik və adekvat ca¬vab verməsi, beynəlxalq hüquqa və Azərbaycan xalqının milli maraqlarına əsaslanan çoxşaxəli, effektiv diploma¬tiya aparması 44 günlük savaşın hər uğurlu hərbi əməliyyatı zamanı sübut olundu. 

    Bu gün 19 il prezidentlik fəaliyyəti dövründə ulu öndər Heydər Əliyev siyasətinin layiqli davamçısı Müzəffər Ali Baş Komandan, Prezident İlham Əliyev qəhrəman Milli Ordumuzun və qədirbilən xalqımızın sayəsində 44 günlük Vətən savaşından tarixi zəfərlə çıxdı.“Şuşasız Qarabağ, Qarabağsız Şuşa yoxdur” deyən Ulu Öndər Heydər Əliyevin bu arzusunu da bu gün Prezident İlham Əliyev “Şuşasız işimiz yarımçıq qalar» deyərək reallaşdırdı.
Artıq torpaqlarımız işğaldan azaddır, respublikamızın ərazi bütövlüyü bərpa olunub. Bu gün İlham Əliyevin liderliyi ilə müstəqilliyimizin ən şərəfli tarixi yazılır. Ona görə indi əzəmətli dövlətimiz kimi milli bayramlarımız da bir başqadır, daha möhtəşəmdir. Müasir Azərbaycan dövlətinin banisi, Ulu Öndər Heydər Əliyevin və torpaqlarımızın azadlığı uğrunda canından keçən şəhidlərimizin ruhları da şaddır.

    Bu gün də Ulu Öndər Heydər Əliyevin müəyyən etdiyi yol davam etdirilir. Azərbaycan inkişaf edir, ən uca zirvələrə qalxır, beynəlxalq aləmdə öz nüfuzunu daha da gücləndirir. Azərbaycan getdikcə qüdrətli və dayanıqlı ölkəyə çevrilməklə dünya miqyasında öz mövqeyini və yerini möhkəmləndirir. Əməli fəaliyyəti, xalqına və Vətəninə məhəbbəti ilə ümumxalq sevgisi qazanan Prezident İlham Əliyev son 19 illik prezidentlik fəaliyyəti müddətində Ulu Öndər tərəfindən qarşıya qoyulmuş vəzifələrin öhdəsindən layiqincə gəlir və ölkəmizi uğurlara aparır. Ölkəmizin varlığı məhz ümummilli lider Heydər Əliyevin xidmətidir. Əgər Ulu Öndər olmasaydı, şübhəsiz bugünkü qüdrətli Azərbaycan olmazdı. Biz xalq olaraq onun müdrikliyi sayəsində azad, firavan yaşayırıq.

    Xalqımız əmindir ki, müstəqil Azərbaycan Heydər Əliyev ideyaları işığında Prezident İlham Əliyevin rəhbərliyi ilə daha yüksək zirvələr fəth edəcək. Qalib Liderimiz Prezident İlham Əliyevin rəhbərliyi ilə Böyük Qayıdışın reallaşdırılması istiqamətində təxirəsalınmaz tədbirlər həyata keçirilməklə, düşmənin yerlə-yeksan etdiyi Qarabağ dünyanın ən gözəl guşələrindən birinə çevriləcək. 

    Milli Qurtuluş Gününün mahiyyətini və fəlsəfəsini dərk etmək üçün bugünkü Azərbaycana baxmaq kifayətdir. Hazırda ölkəmizdə bütün sahələrdə dayanıqlı inkişafa nail olunub, əmin-amanlıq, sabitlik hökm sürür, xalqımız xoşbəxt və firavan yaşayır. Həmçinin Azərbaycan müstəqil dövlət olaraq dünyada öz mövqeyini müəyyənləşdirib, regionun lider dövləti hesab olunur, qlobal təşəbbüslərlə çıxış edir. Dünyanın aparıcı dövlətləri Azərbaycanla əlaqələr qurmaqda, genişləndirməkdə çox maraqlıdırlar. Bir sözlə, Azərbaycan tarixinin ən şanlı və şərəfli dövrünü yaşayır. Bütün bu uğurlar Ulu Öndərin siyasi kursunun layiqli davamıdır ki, dövlətimizin başçısı İlham Əliyev bu işin öhdəsindən ləyaqətlə gəlir. İnanırıq ki, Heydər Əliyevin ideyaları hər zaman yaşayacaq, xalqımızı daha böyük uğurlara, parlaq gələcəyə doğru aparacaq.

    Müzəffər Ali Baş Komandan İlham Əliyevin rəhbərliyi altında Azərbaycanın mövcud durumu, bugünkü reallıqlar sübut etdi ki, Heydər Əliyev yolu ancaq uğur, işıqlı gələcək vəd edən yoldur. Çətin dövrdə Azərbaycanı yox olmağın astanasın¬dan döndərdiyi və bu tarixi missiyanın öhdəsindən gəldiyi üçün Azərbaycan xalqı ümummilli lider Heydər Əliyevin əziz xatirəsini hər zaman dərin ehtiram¬la yad edir və edəcəkdir. Bu uğurların əsasını qoymuş Ulu Öndər Heydər Əliyevin adı isə qədirbilən Azərbaycan xalqının qəlbində daim yaşayacaqdır.

Hikmət DARÇINOV,
Balakən rayon İcra və Probasiya şöbəsinin 
rəisi vəzifəsini icra edən, kiçik ədliyyə müşaviri

DİQQƏT! Şikayət və təklifləriniz, gördüyünüz və eşitdiyiniz hər hansı bir maraqlı məlumatı 050 691 32 26 Whatsapp nömrəsinə göndərin

Ölkəmiz uğurla inkişaf edir, əhalinin rifah halı getdikcə yaxşılaşır - MÜSAHİBƏ


Şərh yaz

Şərh yaz

yenilə, əgər kod görünmürsə