Balaken.info Balakən Rayon İcra Hakimiyyətinin rəsmi Facebook səhifəsinə istinadən xəbər verir ki, Noyabrın 9-da  Balakən Bayraq Muzeyində  Dövlət Bayrağı Gününə həsr olunan tədbir keçirilib. Tədbirdə Balakən Rayon İcra Hakimiyyətinin məsul əməkdaşları, idarə, müəssisə və təşkilatların rəhbərləri, kollektivləri, şəhid ailələri, qazilər və rayon ictimaiyyətinin nümayəndələri iştirak ediblər.

Öncə Ulu Öndər Heydər Əliyevin və respublikamızın ərazi bütövlüyü uğrunda canlarından keçmiş şəhidlərimizin əziz xatirəsi bir dəqiqəlik sükutla yad edilib, Azərbaycan Respublikasının Dövlət Himni səsləndirilib.

Dövlət Bayrağı Gününə həsr olunmuş film nümayiş olunub.

Tədbirdə çıxış edən Balakən Rayon İcra Hakimiyyəti başçısının müavini Turan Dibirov qeyd edib ki, Azərbaycanın üçrəngli Dövlət Bayrağı xalqımızın milli qürurunu, dövlətçilik ənənələrini və müstəqillik iradəsini təcəssüm etdirən ən ali rəmzlərdəndir. Ali Baş Komandan İlham Əliyevin rəhbərliyi, qəhrəman Azərbaycan Ordusunun şücaəti, şəhidlərimizin canı və qazilərimizin fədakarlığı hesabına üçrəngli bayrağımız bu gün ölkəmizin bütün suveren ərazilərində ucalır. Artıq Dövlət Bayrağı Gününü ərazi bütövlüyünü və suverenliyini tam təmin edən qalib dövlətin milli qürur bayramı kimi qeyd edirik. 

Rayon Ağsaqqallar Şurasının sədri Cavanşir Alqayev, Vətən müharibəsi qazisi Ömər Bozbaxov, Ulu Öndər  Heydər Əliyevin iştirakı  ilə keçirilən Şəki Olimpiya İdman Kompleksinin açılış mərasimində Azərbaycan  Bayrağını dalğalandıran Turanə  Məmmədova çıxış edərək üçrəngli bayrağımızın Xankəndidə, Şuşada, Xocalıda, Ağdərədə və işğaldan azad edilmiş bütün ərazilərimizdə dalğalanmasının xalqımızın onilliklər boyu apardığı ədalətli mübarizənin təntənəsi olduğunu vurğulayıblar. Bildirilib ki, Dövlət Bayrağı Günü həm də gələcək nəsillərə milli dövlətçilik dəyərlərinin, vətənpərvərlik ruhunun və müstəqilliyimizin qorunmasının əhəmiyyətini aşılamaq baxımından mühüm məna daşıyır. Bu gün Azərbaycan xalqı öz bayrağına yalnız dövlət rəmzi kimi deyil, həm də tarixi Zəfərinin, milli ləyaqətinin və qüdrətli dövlətçiliyinin təcəssümü kimi baxır.
Daha sonra rayon mədəniyyət işçiləri tərəfindən Dövlət Bayrağı Gününə həsr olunan ədəbi-bədii kompozisiya nümayiş olunub.

Şahidi olduğunuz hadisələri çəkib bizə göndərin! 7/24 whatsapp