Balaken.info Balakən Rayon İcra Hakimiyyətinin rəsmi Facebook səhifəsinə istinadən xəbər verir ki, Azərbaycan Ordusunun 44 günlük Vətən müharibəsində qazandığı tarixi Qələbənin 6-cı ildönümü münasibətilə Balakən rayonunda silsilə tədbirlər keçirilib. Zəfər Günü ilə əlaqədar Balakən şəhəri dövlət bayraqları, “Xarı bülbül” təsvirləri ilə bəzədilib. 

Əlamətdar tarixi gün münasibətilə Balakən Rayon İcra Hakimiyyətinin başçısı Natiq Ağayev, Milli Məclisin deputatı Nəsib Məhəməliyev, rayon icra hakimiyyətinin əməkdaşları, rayon hüquq-mühafizə orqanlarının və idarə, müəssisələrin rəhbərləri və kollektivləri, şəhid ailələri, qazilər, veteranlar və ictimaiyyət nümayəndələri əvvəlcə xalqımızın böyük oğlu, ümummilli lider Heydər Əliyevin abidəsi önünə gül dəstələri düzüb, xatirəsinə ehtiramlarını bildiriblər. Ölkəmizin ərazi bütövlüyü uğrunda canlarından keçmiş şəhidlərimizə dərin hörmət əlaməti olaraq Şəhidlər Xiyabanını ziyarət edərək qəhrəman Vətən oğullarının xatirəsini yad ediblər.

Daha sonra rayon Mədəniyyət Mərkəzində davam etdirilən tədbirdə ulu öndər Heydər Əliyevin və Azərbaycanın suverenliyi, müstəqilliyi, ərazi bütövlüyü uğrunda canından keçən şəhidlərimizin əziz xatirəsi bir dəqiqəlik sükutla yad edilib, Azərbaycan Respublikasının Dövlət Himni səsləndirilib.

Tədbirdə çıxış edən Balakən Rayon İcra Hakimiyyəti başçısı Natiq Ağayev Zəfər Gününün 6-cı ildönümü münasibətilə şəhid ailələrini, qaziləri və müharibə iştirakçılarını təbrik edib, üçrəngli bayrağımızın tarixi torpaqlarımızda daim əzəmətlə dalğalanacağını qürur və əminliklə vurğulayıb. RİH başçısı bildirib ki, 8 Noyabr – Zəfər Günü milli birliyimizin, yenilməz iradəmizin və qəhrəmanlığımızın təntənəsidir. Prezident, Müzəffər Ali Baş Komandan İlham Əliyevin qətiyyətli rəhbərliyi, rəşadətli Azərbaycan Ordusunun qəhrəmanlığı və xalqımızın sarsılmaz birliyi sayəsində 44 günlük Vətən müharibəsində qazanılan tarixi Qələbə 30 ilə yaxın davam edən işğala son qoyaraq ölkəmizin ərazi bütövlüyünün bərpasını təmin edib.

Rayon rəhbəri qeyd edib ki, bu möhtəşəm Zəfərin təməlində Ulu Öndər Heydər Əliyevin hakimiyyətə qayıdışı ilə əsası qoyulan dövlət quruculuğu və inkişaf siyasəti dayanır. Məhz həmin siyasi kursun Prezident cənab İlham Əliyev tərəfindən uğurla davam etdirilməsi Azərbaycanın qüdrətli dövlətə çevrilməsinə, müasir və güclü ordunun formalaşmasına, xalqımızın uzun illər həsrətində olduğu tarixi torpaqlarına qovuşmasına zəmin yaradıb. Vurğulanıb ki, bu gün xalqımız qalib xalq, Azərbaycan isə qalib dövlət kimi tarixinin ən şərəfli dövrünü yaşayır.

Tədbirdə çıxış edən Milli Məclisin deputatı Nəsib Məhəməliyev, Vətən müharibəsi şəhidi Elmir Kərimovun anası Gülşən Kərimova xalqımızın 44 günlük Vətən müharibəsində qazandığı tarixi Qələbənin əhəmiyyətindən, şəhidlərimizin qəhrəmanlığından və Azərbaycan Ordusunun Şanlı Zəfər yolundan danışıblar. Bildirilib ki, Vətənimizin azadlığı və ərazi bütövlüyü uğrunda canlarından keçən qəhrəmanlarımızın əziz xatirəsi xalqımızın qəlbində əbədi yaşayacaq, onların göstərdikləri şücaət gələcək nəsillər üçün əsl vətənpərvərlik nümunəsi olacaqdır. Yeniləşən, inkişaf edən, getdikcə qüdrətlənən Azərbaycan Respublikası möhtəşəm Zəfəri, qələbələri və nailiyyətləri ilə bu gün də öz şərəfli tarixinə yeni səhifələr yazır. Prezident İlham Əliyevin rəhbərliyi ilə əldə olunan bütün bu uğurlar, nailiyyətlər, qələbələr, zəfərlər isə müstəqil və qüdrətli Azərbaycanı, qalib xalqımızı daha uca zirvələrə daşıyacaqdır.

Tədbir daha sonra bədii proqramla davam etdirilib. Konsert proqramında ifaçılar tərəfindən vətənpərvərlik, milli birlik və Zəfər ruhunu tərənnüm edən musiqi nömrələri səsləndirilib. Rayon Mədəniyyət Mərkəzinin əməkdaşlarının hazırladığı ədəbi-bədii kompozisiyalar və musiqi nömrələri izləyicilərə bayram ovqatı bəxş edib.

Axşam saatlarında Zəfər Günü münasibətilə möhtəşəm atəşfəşanlıq təşkil olunub. 

Şahidi olduğunuz hadisələri çəkib bizə göndərin! 7/24 whatsapp