Balaken.info Balakən Rayon İcra Hakimiyyətinin rəsmi Facebook səhifəsinə istinadən xəbər verir ki, 44 günlük Vətən müharibəsində şəhidlik zirvəsinə ucalan Sarkayev Nəcməddin Əli oğlunun əziz xatirəsi məzarı başında ehtiramla yad edilib.

Anım mərasimində Balakən Rayon İcra Hakimiyyətinin başçısı Natiq Ağayev, Yeni Azərbaycan Partiyası Balakən rayon təşkilatının nümayəndəsi, rayonun hüquq-mühafizə orqanlarının rəhbərləri, N.Davudov adına Şərif 1 saylı kənd tam orta məktəbinin kollektivi, “Balakən Rayon Mərkəzi Xəstəxanası” publik hüquqi şəxsin nümayəndəsi, digər dövlət qurumlarının təmsilçiləri, Balakən Rayon Ağsaqqallar Şurasının sədri, şəhid ailələri, qazilər, din xadimləri və rayon ictimaiyyətinin nümayəndələri iştirak ediblər.

Mərasimdə şəhidin ruhuna dualar oxunub, onun həyat və döyüş yolundan, Vətənə bağlılığından, döyüşlərdə göstərdiyi şücaət və qəhrəmanlıq nümunələrindən bəhs edilib. Qeyd olunub ki, Vətənimizin ərazi bütövlüyü uğrunda canlarından keçərək şəhidlik zirvəsinə ucalan qəhrəmanlarımızın əziz xatirəsi xalqımız tərəfindən daim ehtiramla yad edilir və onların göstərdikləri qəhrəmanlıq gələcək nəsillər üçün əsl vətənpərvərlik örnəyidir.
Şəhidin valideynləri onlara göstərilən diqqət və qayğıya görə Azərbaycan Respublikasının Prezidenti cənab İlham Əliyevə və Birinci vitse-prezident Mehriban xanım Əliyevaya minnətdarlıqlarını bildiriblər.

Qeyd edək ki, Nəcməddin Sarkayev 9 oktyabr 1999-cu ildə Balakən rayonunun Şərif kəndində anadan olub. 2006–2017-ci illərdə N.Davudov adına Şərif 1 saylı kənd tam orta məktəbində təhsil alıb.

O, 2020-ci il sentyabrın 27-də başlayan Vətən müharibəsində Ağdərə və Suqovuşan istiqamətlərində gedən döyüşlərdə iştirak edib. 6 noyabr 2020-ci ildə Ağdərə istiqamətində gedən döyüşlər zamanı qəhrəmancasına şəhid olub. Şəhidimiz Şərif kənd qəbiristanlığında dəfn edilib.

Azərbaycan Respublikasının Prezidenti cənab İlham Əliyevin müvafiq sərəncamları ilə Nəcməddin Sarkayev ölümündən sonra “Vətən uğrunda”, “Suqovuşanın azad olunmasına görə” və “Cəsur döyüşçü” medalları, eləcə də 3-cü dərəcəli “Vətənə xidmətə görə” ordeni ilə təltif edilib.
Allah bütün şəhidlərimizə rəhmət eləsin! 

Şahidi olduğunuz hadisələri çəkib bizə göndərin! 7/24 whatsapp