Balakən rayonunda 44 günlük Vətən müharibəsində qəhrəmancasına şəhid olmuş Harun Alqayev və Elməddin Şindiyevin əziz xatirəsi ehtiramla yad edilib.

Balaken.info xəbər verir ki, şəhidlərin anım mərasimi onların məzarları önündə keçirilib.

Anım mərasimində Balakən Rayon İcra Hakimiyyəti başçısının müavini Turan Dibirov, rayonun hüquq mühafizə orqanlarının əməkdaşları, dövlət qurumlarının nümayəndələri, şəhid valideynləri, qazilər və rayon ictimaiyyətinin nümayəndələri iştirak ediblər.

Mərasimdə şəhid Harun Alqayev və Elməddin Şindiyevin ruhlarına dualar oxunub, onların vətənpərvərliyindən və döyüşlərdə göstərdikləri şücaətdən bəhs olunub. Vətən qarşısında öz borcunu ləyaqətlə yerinə yetirərək şəhidlik zirvəsinə ucalan qəhrəmanların əziz xatirəsinin xalqımız tərəfindən daim ehtiramla yad edildiyi vurğulanıb.

Şəhidlərin valideynləri hər zaman onlara göstərilən diqqət və qayğıya görə Prezident cənab İlham Əliyevə və Birinci vitse-prezident Mehriban xanım Əliyevaya minnətdarlıqlarını bildiriblər.

Qeyd edək ki, Harun Alqayev 14 iyul 1992-ci ildə Balakən rayonunun Gərəkli kəndində anadan olub. O, Balakən şəhəri İ.Nəsimi adına 2 saylı tam orta məktəbdə, Cəmşid Naxçıvanski adına Hərbi Liseydə təhsil alıb. Ulu Öndər Heydər Əliyev adına Azərbaycan Ali Hərbi Məktəbi bitirib.
Azərbaycan Ordusunun Xüsusi Təyinatlı Qüvvələrinin baş leytenantı olan Harun Alqayev 2020-ci il sentyabrın 27-də başlayan Vətən müharibəsi zamanı Murovdağın, Kəlbəcərin, Cəbrayılın, Xocavəndin və Füzulinin azadlığı uğrunda gedən döyüşlərdə iştirak edib. O, 10 oktyabr 2020-ci ildə Xocavənd rayonu uğrunda gedən döyüşlər zamanı qəhrəmancasına şəhid olub. Harun Alqayev Balakən Şəhidlər Xiyabanında dəfn edilib.
Azərbaycan Respublikasının Müdafiə Nazirinin müvafiq əmrlərinə əsasən Harun Alqayev xidməti dövründə "Azərbaycan Respublikası Silahlı Qüvvələrinin 95 illiyi (1918-2013)" və "Azərbaycan Ordusunun 100 illiyi (1918-2018)" yubiley medalları ilə təltif olunub.

Azərbaycan Respublikasının Prezidenti cənab İlham Əliyevin müvafiq Sərəncamları ilə Harun Alqayev ölümündən sonra “Vətən uğrunda”, "İgidliyə görə", "Kəlbəcərin azad olunmasına görə", "Xocavəndin azad olunmasına görə", "Cəbrayılın azad olunmasına görə" “Füzulinin azad olunmasına görə” medalları və “Azərbaycan Bayrağı” ordeni ilə təltif edilib.

Şəhid Elməddin Şindiyev  6 mart 1995-ci ildə Balakən rayonunun Talalar kəndində anadan olub. 2001—2012-ci illərdə 2 saylı Talalar kənd tam orta məktəbində təhsil alıb.

Azərbaycan Ordusunun müddətdən artıq həqiqi hərbi xidmət hərbi qulluqçusu olan Elməddin Şindiyev 2020-ci il sentyabrın 27-də başlayan Vətən müharibəsi zamanı Suqovuşanın azadlığı uğrunda gedən döyüşlərdə iştirak edib. O, 10 oktyabr 2020-ci ildə Suqovuşan istiqamətində gedən döyüşlər zamanı qəhrəmancasına şəhid olub. Elməddin Şindiyev Balakən Şəhidlər Xiyabanında dəfn edilib.

Azərbaycan Respublikasının Prezidenti cənab İlham Əliyevin müvafiq Sərəncamları ilə Elməddin Şindiyev ölümündən sonra “Vətən uğrunda”, “Suqovuşanın azad olunmasına görə”, "Kəlbəcərin azad olunmasına görə", “Cəsur döyüşçü” medalları və 3-cü dərəcəli “Vətənə xidmətə görə” ordeni ilə təltif edilib.

Allah bütün şəhidlərimizə rəhmət eləsin!

Şahidi olduğunuz hadisələri çəkib bizə göndərin! 7/24 whatsapp