Ölkəmizin ərazi bütövlüyü və müstəqilliyi uğrunda canlarından keçmiş şəhidlərimizin əziz xatirəsi Balakən rayonunda dərin ehtiramla yad edilib.

Anım Günü ilə əlaqədar Balakən Şəhidlər xiyabanında keçirilən tədbirdə Balakən Rayon İcra Hakimiyyətinin başçısı Natiq Ağayev, icra hakimiyyətinin əməkdaşları, hüquq-mühafizə orqanlarının, eləcə də rayonda fəaliyyət göstərən idarə və müəssisələrin rəhbərləri, şəhid ailələri, qazilər, müharibə veteranları və ictimaiyyət nümayəndələri iştirak ediblər.

Tədbir iştirakçıları şəhidlərin məzarlarını ziyarət edərək onların əziz xatirəsini ehtiramla yad ediblər. Şəhidlərin məzarları üzərinə gül dəstələri düzülüb, ruhlarına dualar oxunub.

Saat 12:00-da Azərbaycanın ərazi bütövlüyü uğrunda canlarını fəda etmiş şəhidlərin xatirəsi bir dəqiqəlik sükutla yad olunub. Həmin anda avtomobillərdən siqnallar verilib.

Anım tədbirinin davamı olaraq Yevlax-Zaqatala-Gürcüstan dövlət sərhədi avtomobil yolunun Katex kəndindən keçən hissəsində, həmçinin rayonun digər ərazilərində ağacəkmə aksiyası keçirilib.

Aksiya çərçivəsində müxtəlif növ ağaclar əkilib. Əkilən ağaclar suvarılıb, onların ətrafında mühafizə tədbirləri görülüb.

Keçirilən tədbirlər şəhidlərin əziz xatirəsinə ehtiramın ifadəsi olmaqla yanaşı, onların göstərdiyi qəhrəmanlığın və Vətən qarşısındakı xidmətlərinin daim yaşadılmasının mühüm nümunəsi olub.

Şahidi olduğunuz hadisələri çəkib bizə göndərin! 7/24 whatsapp