15 İyun – Milli Qurtuluş Günü Balakən rayonunda geniş şəkildə qeyd olunub. Tədbirlərdə Balakən Rayon İcra Hakimiyyətinin başçısı Natiq Ağayev, rayonun hüquq-mühafizə orqanlarının rəhbərləri, idarə, müəssisə və təşkilatların nümayəndələri, şəhid ailələri, qazilər və ictimaiyyət nümayəndələri iştirak ediblər.

Bayram tədbirləri çərçivəsində iştirakçılar əvvəlcə Ümummilli Lider Heydər Əliyevin abidəsini ziyarət edərək önünə gül dəstələri düzüb, dahi şəxsiyyətin əziz xatirəsini ehtiramla yad ediblər.

Daha sonra rayon Mədəniyyət Mərkəzində Qara Qarayev adına Mərkəzi İncəsənət Məktəbi və Balakən şəhər Uşaq İncəsənət Məktəbinin birgə təşkilatçılığı ilə Milli Qurtuluş Gününə həsr olunmuş bədii-musiqili proqram təqdim edilib. Tədbirdən əvvəl qonaqlar şagirdlərin əl işlərindən ibarət sərgiyə baxış keçiriblər.

Konsert proqramı başlamazdan əvvəl Ulu Öndər Heydər Əliyevin və Vətən uğrunda canlarını fəda etmiş şəhidlərin əziz xatirəsi bir dəqiqəlik sükutla yad edilib, daha sonra Azərbaycan Respublikasının Dövlət Himni səsləndirilib.

Konsert proqramının rəsmi hissəsində çıxış edənlər Milli Qurtuluş Gününün Azərbaycan dövlətçiliyinin tarixində mühüm yer tutduğunu vurğulayaraq, Ulu Öndər Heydər Əliyevin ölkənin müstəqilliyinin qorunması, sabitliyin bərqərar olunması və inkişaf strategiyasının müəyyənləşdirilməsindəki müstəsna xidmətlərindən bəhs ediblər. Bildirilib ki, Ümummilli Liderin əsasını qoyduğu siyasi kurs Prezident İlham Əliyev tərəfindən uğurla davam etdirilir və bunun nəticəsində Azərbaycan beynəlxalq aləmdə mövqelərini daha da möhkəmləndirib.

Tədbirdə Ulu Öndər Heydər Əliyevin həyat və siyasi fəaliyyətinə həsr olunmuş videoçarxlar nümayiş etdirilib, şagirdlərin ifasında vətənpərvərlik ruhunu əks etdirən musiqi nömrələri və bədii kompozisiyalar təqdim olunub.

Günün sonunda Balakən Rayon İcra Hakimiyyətinin və rayon Mədəniyyət Mərkəzinin təşkilatçılığı ilə Heydər Əliyev adına mədəniyyət və istirahət parkında geniş konsert proqramı təşkil edilib. Konsertdə rayonun tanınmış incəsənət nümayəndələri çıxış edərək tamaşaçılara yaddaqalan anlar yaşadıblar. Bayram tədbiri sakinlər tərəfindən böyük maraq və coşqu ilə qarşılanıb.

Balakəndə keçirilən tədbirlər Milli Qurtuluş Gününün tarixi əhəmiyyətini bir daha diqqətə çatdırmaqla yanaşı, dövlətçilik ənənələrinə sədaqətin və milli birliyin nümayişinə çevrilib.

Şahidi olduğunuz hadisələri çəkib bizə göndərin! 7/24 whatsapp