Üç gün əvvəl Dövlət Təhlükəsizliyi Xidməti (DTX) tərəfindən həbs edilən Balakən Rayon İcra Hakimiyyətinin başçısı İslam Rzayevi kimin əvəz etdiyi məlum olub.

Balaken.info - nun əldə etdiyi məlumata görə, icra başçısının səlahiyyətləri müvəqqəti olaraq birinci müavin Turan Dibirova həvalə edilib.

Bu barədə artıq rayon icra hakimiyyətinin kollektivi də məlumatlandırılıb.

Qeyd edək ki, Prezidentin Sərəncamı ilə İslam Rzayev vəzifəsindən azad edilib.

Dibirov Turan Eldar oğlu 1986-cı ildə Balakən rayonunun Qullar kəndində anadan olub. 2007-ci ildə Azərbaycan Kənd Təsərrüfatı Akademiyasını iqtisadiyyat və idarəetmə ixtisası üzrə fərqlənmə diplomu ilə bitirib. Daha sonra 2016-cı ildə Azərbaycan Respublikasının Prezidenti yanında Dövlət İdarəçilik Akademiyasında dövlət və bələdiyyə idarəetməsi ixtisası üzrə magistr təhsili alıb.

Əmək fəaliyyətinə 2008-ci ildə Azərbaycan Respublikasının Prezidenti yanında Dövlət Qulluğu Məsələləri üzrə Dövlət Komissiyasının müsabiqə və müsahibə mərhələsindən uğurla keçərək Balakən Rayon Gənclər və İdman İdarəsində gənclərlə iş üzrə aparıcı məsləhətçi kimi başlayıb.

2011-ci ildə Balakən Rayon İcra Hakimiyyəti başçısı Aparatında Sosial-iqtisadi məsələlər şöbəsində aparıcı məsləhətçi vəzifəsinə təyin olunub. Beş il bu vəzifədə çalışdıqdan sonra qulluqda yüksəlişlə Sosial-iqtisadi inkişafın təhlili və proqnozlaşdırılması şöbəsində müdir müavini vəzifəsinə gətirilib.

Altı il bu vəzifədə fəaliyyət göstərdikdən sonra, 26 sentyabr 2022-ci ildə Balakən Rayon İcra Hakimiyyəti başçısının birinci müavini vəzifəsinə təyin olunub.

2011-ci ildən Yeni Azərbaycan Partiyasının (YAP) üzvüdür. Evlidir, iki övladı var.

Şahidi olduğunuz hadisələri çəkib bizə göndərin! 7/24 whatsapp