Prezident İlham Əliyev Saatlı və Biləsuvar rayonlarına təyin olunan icra başçıları ilə görüşdə növbəti dəfə çox ciddi tezislər irəli sürdü.

Bu gün üçün əhəmiyyət kəsb edən tezislərdən biri də düzgün kadr siyasəti ilə bağlı oldu. Prezident qeyd etdi ki, kadr siyasətində gərək düzgün addımlar atılsın: “Bəzi hallarda rəhbərlər özlərinə yaxın olan, özlərinə sadiq sayılan kadrları önə çəkirlər və o kadrların digər xüsusiyyətləri nəzərə alınmır. İlk növbədə, hansısa məmura yox, dövlətə sədaqətli insanlar, Vətənə sədaqətli insanlar önə çəkilməlidir”.

Millər vəkili Nəsib Məhəmməliyev Visiontv.az-a verdiyi açıqlamada qeyd etdi ki, bu məsələ ilə bağlı Respublika Prezidenti dünən Saatlı və Biləsuvar rayonlarına təyin olunan icra başçılarına verdiyi tövsiyələrində ətraflı münasibət bildirmişdir: “Ölkə Başçısı dövlətin kadr siyasətinə xüsusi əhəmiyyət verdiyini ictimaiyyətin diqqətinə çatdırdı. Məmurlara kadr təyinatlarında hansı meyarlara üstünlük verilməsi, özlərinə yaxınlığı ilə deyil, dövlətə sədaqəti ilə fərqlənənlərə, peşəkarlara, ictimai nüfuzu müsbət olanlara üstünlük vermələrini tapşırdı. 2018-ci il apre ayında keçirilən növbədənkənar seçkilərdən sonra cənab Prezident cəmiyyətin bütün sahələrində köklü islahatların aparılacağı barədə bəyanat verdi. Ötən müddət göstərdi ki, Dövlət idarəetmə sistemindən tutmuş hakimiyyətin bütün qollarını əhatə etmiş islahatlar artıq bəhrəsini verməkdədir. Son illər korrupsiya və rüşvətxorluğa, sosial ədalət prinsiplərinin pozulmasına qarşı aparılan ciddi tədbirlər isə Azərbaycan xalqı tərəfindən alqışlanır. Dəfələrlə ali səviyyədə edilən xəbərdarlıqları qulaq ardına vuran icra başçıları, nazirlər və digər məmurlar sərt şəkildə cəzalandırılır. Bütün proseslər tam şəffaflıqla, ictimaiyyətin gözü qarşısında baş verir. Kadr təyinatlarının belə aparılmasının əhəmiyyəti olduqca böyükdür. Çünki, ölkə Başçısının verdiyi mesajlar təkcə təyinat alan yeni rəhbərlər üçün deyil, bütövlükdə məmur korpusunu, ictimaiyyəti əhatə edir. Hər kəs başa düşməlidir ki, bütün şəxsi maraqlardan ən üstünü dövlətin maraqlarıdır. Müstəqilliyimizin möhkəmlənməsi, daha da inkişaf etdirilməsidir. Cəmiyyətin saflaşmasıdır. Sosial ədalət prinsiplərinin qorunmasıdır. Yalnız belə olan halda biz güclü dövlətə çevrilə bilərik. Xoşbəxt xalq ola bilərik. Mən Prezident İlham Əliyevin gəncləri rəhbər vəzifələrə təyin etməsini yüksək qiymətləndirirəm. İndiyə qədər təyin olunmuş gənclərlə bağlı hər hansı neqativ hallar eşitməmişəm. İctimai rəylər də bunu təsdiq edir”.