Nəsib Məhəməliyev: “Gələcəkdə daha ciddi problemlərlə üz-üzə qalmaq istəmiriksə, bunu etməliyik”

Rəsmi mənbələrin verdiyi məlumata görə, Livandan Ermənistana 100-dən çox erməni gətirilib. Hansı ki, bir neçə gün öncə XİN də Ermənistanın Livandakı erməniləri Qarabağa gətirmək cəhdlərini qınayan bəyanatla çıxış etmişdi.

Ermənistanın Livandakı erməniləri Qarabağda məskunlaşdırmaq cəhdlərinin qarşısını almaq, rəsmi İrəvanı bu qanunsuzluğa görə cəzalandırmaq üçün hansı effektiv addımlar atıla bilər? Məlum qanunsuzluğu faktlar əsasında beynəlxalq təşkilatların diqqətinə çatdırmaqla işğalçıya qarşı hansısa sanksiyaların tətbiqinə nail olmaq mümkündürmü?

Moderator.az-a açıqlama verən millət vəkili Nəsib Məhəməliyev problemin həlli istiqmaətində atılması gərəkən addımlara diqqət çəkib:

“Ermənistanın işğal edilmiş torapqlarımızda dgər ölkələrdən gətirilən erməniləri məskunlaşdırmaq siyasəti yeni məsələ deyil. Uzun illərdir ki, İrəvan bu niyyətini həyata keçirməyə çalışır. Dünyanın ayrı-ayrı ölkələrində, xüsusilə də türkdilli respublikalarında, Yaxın Şərq ölkələrində yaşayan erməniləri müxtəlif cəlbedici təkliflərlə Qarabağda yerləşdirməyə cəhd edir. Ancaq uzun illərin təcrübəsi göstərir ki, onlar bu yöndə ciddi bir uğur əldə edə bilməyiblər. Baxmayaraq ki, müharibələrə səhnə olan İraq, Suriya və Livan kimi dövlətlərdən bəzi erməni ailələrinin Qarabağa köçürüldüyü məlumdur. Onlar Ermənistan və ya Qarabada məskunlaşmağa maraq göstərmir, buna üçüncü ölkəyə getmək üçün bir vasitə kimi yanaşırlar.

Beyrutda erməni məhəllələrinə də təsir göstərən məlum partlayışlardan sonra belə bir köç daha çox aktuallıq qazana bilər. Lakin biz buna qəti şəkildə etiraz etməli, konkret adımlar atmalıyıq. Çox yaxşı olar ki, baş verənlərlə bağlı BMT-nin faktaraşdırıcı missiyasını tələb edək. Bunun üçün bizim hüquqi əsasımız var.  BMT-nin Təhlükəsizlik Şurasının 4 qətnaməsi mövcuddur. Eyni zamanda, yaxşı olar ki, ATƏT-in Minsk qrupunun həmsədrlərini məlumatlandıraq.

Həm XİN, həm də Müdafiə Nazirliyi bununla bağlı kəskin mövqe ortaya qoymalıdır. Bildirməliyik ki, işğal edilmiş ərazilərdə hər hansı məskunlaşma faktı qeydə alınarsa, dərhal vurulacaq. Biz bu mövqedən çıxış etməli və bunu praktik şəkildə gerçəkləşdirməliyik. Əgər biz bunu real şəkildə etməsək, o zaman gələcəkdə məskunlaşma ilə bağlı daha böyük problemlərlə qarşılaşa bilərik.

Yuxarıda qeyd etdiyimiz kimi, Ermənistan 10-15 il öncə də bu siyasəti həyata keçirməyə cəhd edib. ATƏT-in faktaraşdırıcı missiyası bir neçə dəfə bölgədə olub. Biz indiki halda da həm ATƏT-i, həm də aparıcı dünya dövlətlərini baş verənlərlə bağlı məlumatlandırmalı, buna paralel olaraq istənilən yeni məskunlaşma bizim tərəfimizdən hədəfə alınmalıdır. Biz gələcəkdə daha ciddi problemlərlə üz-üzə qlamaq istəmiriksə, bunu etməliyik”.