Nəsib Məhəməliyev: “Necə ki, 2016-cı ilin aprel məğlubiyyəti Ermənistanda ciddi daxili qarşıdurmaya səbəb oldu”

Artıq üç gündür Azərbaycan-Ermənistan sərhəddində döyüşlər gedir və düşmən ciddi itkilər verməkdədir.

Ermənistanın hərbi itkilərinin artması işğalçı dövlət daxilində Paşinyan hökumətinə qarşı narazılığı artıra, düşmən ölkədə daxili qarşıdurmanı gücləndirə bilərmi? Başqa sözlə desək, Paşinyanın öz təxribatının qurbanına çevrilmə ehtimalı varmı?

Moderator.az-a açıqlama verən millət vəkili Nəsib Məhəməliyev bu ehtimalın yüksək olduğunu vurğuladı:

“Şübhəsiz ki, belə bir ehtimal var. Çünki yaxın keçmişin tarixinə nəzər salsaq, konkret olaraq 2016-cı ilin aprel döyüşlərindəki məğlubiyyətdən sonra 20 il Ermənistana rəhbərlik etmiş ,,Qarabağ klanı,, hakimiyyətdən getmək məcburiyyətində qaldı. Son zamanlar Paşinyanın, Ermənistanın idarəetməsində buraxdığı çoxsaylı səhvlər, verdiyi vədləri yerinə yetirə bilməməsi, siyasi opponentlərini həbs etdirməsi cəmiyyətdə ciddi qarşıdurmalara səbəb olmuşdu. Eyni zamanda, xarici siyasətdə ənənəvi müttəfiqlərindən, daha doğrusu, havadarlarından uzaqlaşmaq cəhdləri də Paşinyan hakimiyyətinə olan narazılıqları artırmışdır. Ona görə də, cəmiyyətin diqqətini daxili problemlərdən yayındırmaq, üzv olduğu Kollektiv Təhlükəsizlik Müqaviləsi Təşkilatına üzv ölkələri Azərbaycana qarşı müharibəyə sövq etmək üçün Paşinyan və havadarlığı riyakarlıqla Tovuz istiqamətində təxribat törətdilər. Düzdür, ordumuz tərəfindən layiqincə cavabları verildi. 

Paşinyan öz təxribatının qurbanına çevrilə bilər. Bu? qısa zaman məsələsidir və ordumuz bu məsələni tezləşdirmək iqtidarındadır. Ancaq burada bəzi xarici amillər var ki, hələlik nəzərə almamaq olmur”.

Seymur ƏLİYEV