İlk növbədə Azərbaycanın Tovuz rayonu ərazisində Ermənistan silahlı qüvvələrinin növbəti təxribatı nəticəsində həlak olmuş şəhidlərimizə, baş leytenant Mahmudov Rəşad Rəşid oğluna, çavuş Sadıqov Vüqar Lətif oğluna, baş əsgər Məmmədov Elşad Dönməz oğluna, əsgər Daşdəmirov Xəyyam Məhəmməd oğluna Allahdan rəhmət diləyirəm, ailələrinə baş sağlığı verirəm. Yaralı əsgərlərimizə tezliklə sağalmağı arzulayıram.

Düşünürəm ki, dünən sərhəddə baş verən hadisələrə görə məsuliyyət birbaşa erməni siyasi hakimiyyətinin üzərinə düşür və son zamanlar Ermənistanın daxilində yaranmış ictimai siyasi vəziyyətlə əlaqədardır. Çünki, Paşinyanın apardığı siyasətin nəticəsində, erməni cəmiyyətində ciddi parçalanmalar və müxtəlif təbəqələr arasında kəskin qarşıdurmalar yaranmışdır. Eyni zamanda, indiki iqtidar komandasının Qərbyönümlü siyasət aparmaq cəhdləri, ənənəvi müttəfiqi Moskvanın maraqları ilə qətiyyən uzlaşmır. Rusiyayönümlü siyasətçilərin təcrid və təqib olunması, onların iqtisadi maraqlarının məhdudlaşdırılması isə münasbətlərin kəskinləşməsinə səbəb olmuşdur. Digər bir məsələ isə, Kollektiv Təhlükəsizlik Müqaviləsi Təşkilatından ermənilərin gözləntiləri ilə bağlıdır. Məlumdur ki, bu təşkilata daxil olan ölkələrlə Azərbaycanın dostluq münasibətləri mövcuddur və o ölkələrin tam əksəriyyəti Ermənistana görə, ölkəmizlə müharibə etmək fikrində deyillər. Bu baxımdan Paşinyan iqtidarı, təxribatları Qarabağ və işğalda olan ərazilərdə deyil, məhz iki dövlətin sərhəddində törətməyə cəhd etdilər. Çünki, gözəl başa düşürlər ki, Kollektiv Təhlükəsizlik Müqaviləsi Təşkilatına üzv dövlətlərin əsasnaməsinə görə, onlar Dağlıq Qarabağ ərazisinə müdaxilə edə bilməzlər. Ona görə də, Ermənistan Rusiya ilə münasibətlərdə əlavə dividentlər əldə etmək üçün təxribatlara başladılar. Ancaq ordumuz düşmənə layiqli cavab verdi və atəşkəs pozulan andan xalqımız bir nəfər kimi öz ordusunun yanında oldu. Azərbaycan ordusu bir daha sübut etdi ki, istənilən an düşməni darmadağın etmək imkanındadır.

visiontv.az