ÜST ekspertləri payızda ehtimal olunsa da, artıq indidən bir sıra ölkələrdə müşahidə olunan koronavirusun ikinci dalğası barədə danışırlar. Karantin rejimini zəiflətmiş ABŞ, İran, Pakistan, Cənubi Koreyada son bir həftə ərzində yoluxma statistikası kəskin şəkildə artıb. Azərbaycanda yoluxma sayının artmasının qarşısını almaq üçün karantin tədbirləri davam etdirilməlidirmi?

Bununla bağlı Sonxeber.az-a danışan deputat Nəsib Məhəməliyev bildirib ki, koronovirus ötən ilin dekabr ayında Çinin Uhan şəhərində aşkarlandığı andan kifayət qədər vaxt keçməsinə baxmayaraq, indiyə qədər nə vaksin icad olunub, nə də ki, yayılmasının qarşısını almaq mümkün olub: "Ümumdünya Səhiyyə Təşkilatının və digər ölkələrin alimləri, mütəxəssisləri ikinci dalğanın payızda olması və yaxud müxtəlif proqnozlar verirlər. Amma görünən odur ki, dünyanın əksər ölkələrində Covid-19 virusuna yoluxanların sayı durmadan artır. Çox təəssüf ki, o cümlədən ölkəmizdə dövlət tərəfindən görülən hər tərəfli tədbirlərə rəğmən virusa yoluxanların sayında artım müşahidə olunur. Bunun səbəbi is, kütləvi maarifləndirici tədbirlərə baxmayaraq, hələ də bir çox insanların karantin rejiminə əməl etməmələri, ictimai yerlərdə qoruyucu maska taxmadan, sosial məsafə gözləmədən davranmalarıdır. Əgər belə davam etsə, əmin olun ki, xəstələrin sayı daha da artacaq. Hesab edirəm ki, bunun qarşısını almaq üçün, konkret olaraq hansı bölgədə artım qeydə alınarsa, orada sərt karantin tədbirlərini davam etdirmək lazımdır".

Aysel Yusifqızı