Həftəsonu qoyulmuş evdən çıxmama qadağası ilə bağlı sosial şəbəkələrdə yetərincə fikir bildirildi. Qərara tənqidi yanaşanlar da oldu, vaxtında və dügün qəbul edildiyini təsdiqləyənlər də. Milli Məclisin deputatı Nəsib Məhəməliyevin Facebook səhifəsindəki paylaşımından bir hissəni diqqətinizə çatdırırıq:

– Koronovirusla bağlı tətbiq olunmuş, məhdudiyyətlər mərhələ ilə götürüldükdən, karantin rejimi yumşaldıqdan sonra bir neçə gün ərzində yeni yoluxanların sayında kəskin artım müşahidə olundu. Buna görə də, operativ qərargah şənbə və bazar günlərində evdən çıxmamaq barədə qərar qəbul etdi.

Cəmi ikicə günlük bir qadağa... Amma cümə günü bəzi vətəndaşlarımızın ərzaq mağazalarındakı çörək və digər məhsullar uğrunda apardıqları mübarizə, olduqca acınacaqlı idi. Belə bir bolluq şəraitində, defisit anlayışının ümumiyyətlə leksikondan itdiyi dövrdə buna nə ad vermək olar?

Bu nə davranış, nə mədəniyyətdir?  İndi İKT əsridir. İstənilən informasiya cəmi 30 saniyə ərzində dünyanın o biri başına çatır. Düşünürəm ki, hər bir ailədə,kollektivlərdə ictimai yerlərdə davranışlarımıza xüsusi diqqət yetirməli, ələlxüsus gənc nəslə ətraf mühitə münasibət qaydalarını təbliğ etməliyik. Millətin, dövlətin müsbət imicinin formalaşdırılması, harada olmasından asılı olmayaraq hər kəsi düşündürməlidir.

Bir məsələni də diqqətinizə çatdırmaq istəyirəm. Müharibə dövründə insanlar aylarla, bəzən daha çox zirzəmilərdə,yerin altında yaradılmış təhlükəsizlik yerlərində yaşamaq məcburiyyətində qalırlar. Ancaq bəzilərimiz cəmi iki gün evdə qalmaq üçün dözümsüzlük nümayiş etdirirlər. İki günə çəkilib sosial şəbəkələrdə paylaşılan görüntülər dediklərimizi təsdiq edir. Müharibə şəraitində yaşayan ölkə üçün, bu olduqca təhlükəlidir. Hesab edirəm ki, bu barədə düşünmək üçün yetərincə əsas var.

Z.BƏŞİRQIZI,
“Xalq qəzeti”