Ötən həftə ölkə başçısı İlham Əliyev yeni baş prokuroru – Kamran Əliyevi qəbul etdi. Görüşdə ölkə başçısı rşvətxorluq hallarından bəhs etdi. Dövlət başçısı bildirdi ki, vacib vəzifələrdən biri korrupsiyaya və rüşvətxorluğa qarşı mübarizədir: “Hesab edirəm ki, prokurorluq orqanları bu istiqamətdə daha fəal iş aparmalıdırlar. Bu xoşagəlməz hallara qarşı Azərbaycanda çox ciddi mübarizə aparılır. Mən bu məsələ ilə bağlı dəfələrlə öz fikirlərimi bildirmişdim.

Bütün dövlət məmurlarını xəbərdar etmişdim və hətta demişdim ki, əgər hansısa dövlət məmuru öz işində düzəlişlər edə bilmirsə, yaxud da ki, istəmirsə, qoy özü könüllü şəkildə dövlət işindən istefa versin. Amma əfsuslar ki, mənim sözlərim bəziləri üçün dərs olmadı və bunun nəticəsində indi Dövlət Təhlükəsizliyi Xidməti bir neçə əməliyyat keçirərək rüşvətxorları, yüksək vəzifə sahiblərini ifşa etdi və onlar artıq cinayət məsuliyyətinə cəlb edilmişlər. Ağstafa, Biləsuvar, Yevlax, Neftçala rayonlarının icra başçıları həbs edilmişdir, ictimaiyyətə bu məsələ ilə bağlı ətraflı məlumat verilmişdir və bundan sonra da ətraflı məlumat veriləcəkdir”.

Ölkə başçısı onu da əlavə etdi ki, qanun qarşısında hamı bərabərdir, Azərbaycan cəmiyyətində korrupsiya və rüşvətxorluq olmamalıdır: “Hər halda biz çalışmalıyıq ki, korrupsiya və rüşvətxorluq üçün meydanı həm inzibati yollarla, həm də institusional üsullarla daraldaq. Eyni zamanda, cəza tədbirləri də tətbiq olunur və tətbiq ediləcəkdir. Ona görə bu dörd rayonda hansı ki, icra başçıları həbs olunub, orada işlər geniş təhlil edilməlidir”.
Millət vəkili onu da əlavə edib ki, müxtəlif dövrlərdə ayrı ayrı nazirlərin, yüksək statuslu məmurların, bank rəhbərlərinin həbs olunmalarını xatırlamaq kifayətdir ki, bu və ya digər formada rüşvətxorluğa, korrupsiyaya qarşı mübarizə aparılıb. Ancaq bu da faktdır ki, son aylarda bu mübarizə sistemli şəkildə, şəffaf aparılır.

Millət vəkili yüksək rütbəli məmurları rüşvətə və qanunsuzluqlara təhrik edən səbəblərdən də danışıb: “İlk növbədə tamahlarının qurbanına çevrilirlər. İkincisi, mənəm-mənəmlik,vəzifənin verdiyi imkanlardan sui-istifadə edərək,bir çoxlarının savadına,peşəkarlığına,əxlaqına görə tutduğu posta layiq olmadığına baxmayaraq,özündən qat-qat ziyalı insanların yanında nöqsanlarını gizlətmək üçün daim təzyiq altında saxlamaq üçün bu addımları atırlar. Bu tipli insanlar düşünür ki, əyalətlərdə bunlar nəzarətdən kənar istədiklərini edə bilərlər, yanılırlar. Söhbət tək əyalətdən getmir, mərkəzdə də islahatların əleyhinə gedən məmurlar kifayət qədərdir”.

Nəsib Məhəməliyevin sözlərinə görə, son aylarda korrupsiya və rüşvətxorluqla bağlı mübarizə daha mükəmməl, peşəkar cəhətdən hazırlıqlı, müasir informasiya texnologiyalardan istifadə etməklə, hər hansı subyektivliyə yol vermədən, sırf real faktlara söykənənərək aparılır: “ Ölkə Başçısının tapşırığı ilə, hüquq mühahifizə orqanları tərəfindən aparılan mübarizə xalq tərəfindən bəyənilir və dəstəklənir. Xatırlayırsınızsa cənab İlham Əliyev 2018-ci ilin aprel seçkilərindən sonra,cəmiyyətin bütün sahələrini əhatə edəcək köklü islahatların aparılacağı barədə bəyanatla çıxış etmişdi. Ötən müddətdə, dövlət idarəetmə sistemində,hakimiyyətin hər üç qolunda ciddi islahatlar aparıldı və proses davam edir.

Dəfələrlə kadr təyinatlarında,onların necə işləmələri, xalqa xidmət etmələri, neqativ hallara yol verməmələri barədə tapşırıqlarını verməsinə baxmayaraq, bəziləri özlərini toxunulmaz hesab edərək qanunsuz fəaliyyətlərini davam etdirdilər. Bununla da minlərlə insanı dövlətdən narazı saldılar. Nəticəsi də belə acınacaqlı olur. Ələlxüsus, bütün dünyanın koronovirus pandemiyası ilə mübarizə apardığı, karantin rejiminə görə dövlətin imkansız ailələrə, günəmuzd çalışan insanlara göstərdiyi yardımı mənimsəyənlərə, əhaliyə şəxsi mülkiyyəti kimi baxan məmurlara qarşı mübarizə sərtləşdirilməlidir. Hər bir məmur dərk etməlidir ki, artıq belə davam edə bilməz. 21-ci əsrdə, 20-ci əsr təfəkkürü ilə yaşamaq, işləmək mümkün deyil. Azərbaycanın müstəqilliyinin möhkəmləsini, təhlükəsizliyini, inkişafını istəyən hər bir vətəndaş, ilk növbədə məmurlar dəyişməlidir. Rüşvətsiz, korrupsiyasız, daha çox mənəvi saflığa köklənən kübar cəmiyyət qurmalıyıq”.

Millət vəkili hesab edir ki, Kamran Əliyevin Baş prokuror təyin olunması Azərbaycan xalqı tərəfindən bir mənalı müsbət qarşılandı və ölkə Başçısı təyinat zamanı islahatların aparılması və rüşvətxorluğa, korrupsiyaya qarşı ciddi mübarizə aparılması barədə tapşırıqlarını verdi: “Düşünürəm ki, Yeni Baş prokurorun müsbət ictimai imici, savadı, peşəkarlığı, bu sahədə də əhəmiyyətli nailiyyətlərin əldə olunmasına səbəb olacaq”.