Azərbaycanda son bir neçə aydır ki, sözün əsl mənasında müsbət tendensiya istiqamətində inqilabi dəyişikliklər baş verir. Həyatımızın bütün sahələrini əhatə edən bu dəyişiklər artıq hüquq sisteminə də sirayət edib. Bu günlərdə respublikaya yeni baş prokurorun təyin edilməsi deyilənlərin təsdiqidir. Görünən odur ki, ölkədə köklü şəkildə islahatlar həyata keçirilir. Bu islahatlar fonunda korrupsiya və rüşvətxorluqla məşğul olan bir sıra məmurların cəzalandırılmasını da müşahidə edirik. Ən son Biləsuvar rayon İcra Hakimiyyəti başçısının korrupsiya və rüşvətxorluğa görə, həbs edilməsi fonunda bunu aydın gördük. Elə millət vəkili Nəsib Məhəməliyevlə də söhbətimiz həm ölkədə həyata keçirilən kadr islahatları, həm də korrupsiya və rüşvətxorluğa qarşı aparılan mübarizə və onun nəticələri ilə bağlı oldu. Millət vəkili "OLAYLAR"-a verdiyi müsahibədə bir sıra vacib məqamlara da toxunub.

-Nəsib müəllim,  dövlət başçısı tərəfindən həyata keçirilən son kadr islahatları, daha doğrusu yeni baş prokurorun təyin edilməsini necə dəyərləndirirsiniz?

-Azərbaycan Prezidenti İlham Əliyevin apardığı kadr islahatlarını zamanında və olduqca aktual hesab edirəm. Demək olar ki, cəmiyyətin bütün sahələrində islahatlar aparılır, gənc, təhsilli, müasir dünyagörüşünə malik şəxslər rəhbər vəzifələrə təyin olunurlar. Əvvəlki Baş prokuror Zakir Qaralov işlədiyi dövrdə dövlətə sədaqətlə xidmət etmiş, son iyirmi ildə prokurorluq orqanlarına rəhbərlik etmişdir.Yeni Baş prokuror Kamran Əliyev cəmiyyətdə peşəkar, savadlı, mədəni, müsbət imicə malik şəxs kimi tanınır. Məhz onun təyinatına münasibət birmənalı şəkildə müsbətdir.

- Bu ölkədə həyata keçirilən genişmiqyaslı islahatların artıq hüquq sahəsinə də keçdiyi anlamını verirmi?

-Bəli, elədir.  Cənab Prezident bu barədə Baş prokurorla keçirdiyi videobağlantıda xüsusi olaraq prokurorluqda və digər hüquq mühafizə orqanlarında islahatların aparılmasının vacibliyi qeyd etdi.

- Dövlət başçısı yeni baş prokurorla videoqəbulda bir sıra vacib məqamlara toxundu və korrupsiya  rüşvətxorluq hallarına qarşı daha ciddi mübarizənin aparılmasının zəruriliyini qeyd etdi. Cənab prezidentin fikirləri onu deməyə əsas verirmi ki, ölkədə korrupsiya və rüşvətxorluğa qarşı mübarizədə yeni mərhələ başlayacaq?

-Əslində korrupsiya və rüşvətxorluğa qarşı mübarizə həmişə aparılıb. Sadəcə əvvəlki illərə baxmaq kifayətdir ki, neçə-neçə nazirlər və digər yüksək vəzifəli məmurlar zaman-zaman həbs olunublar. Bir çoxları tutduqları vəzifələrini itirib. Son beş ayda isə bu istiqamətdə daha sistemli şəkildə mübarizə aparılır. Dövlət başçısı dəfələrlə bu barədə açıq, xalqın qarşısında xəbərdarlıq etməsinə baxmayaraq, bir çox məmurlar köhnə xasiyyətlərindən əl çəkmirlər. Nəticəsi isə, acınacaqlı olur. Bu mübarizə ilə əlaqədar atılan taktiki addımları, yeni forma və metodları nəzərə alsaq, yeni mərhələnin başlandığını demək olar.

-Bu ərəfədə daha bir icra başçısı və bir neçə rayonun icra nümayəndəsinin həbsi onu deməyə əsas verirmi ki, artıq inqilabi addımlar atılır?

-Koronovirusla pandemiyası ilə bağlı tətbiq olunmuş karantin rejimi ərzində işləməyən, imkansız ailələrə dövlət tərəfindən ayrılmış yardımları mənimsəyən məmur, icra başçısı ən böyük cəzaya layiqdir. Ağır cinayət olmaqla bərabər biabırçılıqdır. Dəfələrlə, ölkə başçısının etdiyi xəbərdarlıqları qulaq ardına vurmaq heç bir normal məntiqə sığmır.

-Cənab Prezidentin baş prokurorla söhbətində bir məqam da diqqət çəkdi. Dövlət başçısı bildirdi ki, bəzi nazirliklərdə kimlərisə vəzifəyə təyin etmək üçün pul alınır.  Sizcə, dövlət başçısını bu fikirləri növbəti mərhələdə bəzi nazirliklərdə də oxşar addımların atılması və rüşvətxor məmurların cəzalandırılması ola bilərmi?

-Həqiqətdir ki, dövlət başçısının informasiya mənbələri kifayət qədərdir və heç kim üçün sirr deyil ki, istənilən sahə üzrə Cənab Prezidentdə olan ətraflı məlumat, heç kimdə olmur. Ciddi qanun pozuntuları tək yerli icra hakimiyyətlərində deyil, mərkəzi icra orqanlarında da mövcuddur. Cənab Prezidentin siyasətini mütəmadi izləyən şəxs kimi deyə bilərəm ki, onun sözü hər zaman əməli ilə uzlaşmışdır. Dövlət təhlükəsizliyini hər şeydən üstün tutan ölkə başçısı qəti siyasi iradə ortaya qoyub və bundan nəticə çıxarmayan məmur kimliyindən asılı olmayaraq cəzalandırılacaq.

- Qısa müddətdə artıq dördüncü icra başçısıdır ki  ,  korrupsiya və rüşvətxorluğa görə həbs olunur. Sizcə bütün bunlar digər məmurlara nə üçün dərs olmur və onlar hələ də öz çirkin əməllərini davam etdirirlər?

-Bu tamah və əxlaq məsələsidir. Hisslərinə sahib çıxa bilməyən, tutduğu vəzifənin məsuliyyətini. dərk etməyənlər düşünürlər ki, hər şey belə gedəcək. Bəziləri də kimlərəsə arxayın olurlar ki, buna toxunmazlar. İndi artıq bu da keçmir. Köhnə təfəkkürlə işləmək olmaz. Dövlətin, xalqın maraqları hər şeydən üstündür.

Süleyman İsmayılbəyli