"Nazirlər kabineti yanında operativ qərargahın qəbul etdiyi qərarların hər bir bəndi mövcud reallıqlara adekvatdır və ciddi zərurətdən yaranmışdır".

Bunu Sonxeber.az-a danışan deputat Nəsib Məhəməliyev dəyib.

Deputat qeyd edib ki, koronavirusun yayılmasının qarşısının alınması üçün qabaqlayıcı tədbirlərin əhəmiyyəti olduqca böyükdür: "Bütün ölkə ərazisində karantin tədbirləri aparılır, insanların kütləvi toplanmasının qarşısı alınır, hərəkət məhdudiyyətləri tətbiq olunur, 65 yaşdan yuxarı tənha insanların sosial qayğıları dövlət tərəfindən qarşılanır, xarici ölkələrdə yaşayan insanlarımız çarter reysləri təşkil etməklə gətirilir, ictimai yerlər dezinfeksiya edilir, ictimai nəqliyyatdan istifadə qaydaları tənzimlənir, virusa yoluxmuş və karantin nəzarəti altında olan insanların müayinə, müalicəsinin təmin etmək üçün xarici ölkələrdən lazımi avadanlıqlar, testlər alınıb gətirilir. Əhali arasında geniş maarifləndirici təbliğat aparılır. Azərbaycan xalqı çox gözəl bilir ki, sərt tədbirlərin görülməsi, bu ümumbəşəri bəladan maksimum az itki ilə çıxmaq üçün edilir və ən xırda məsələlər belə sutkanın 24 saatı Prezident İlham Əliyevin şəxsi nəzarətindədir. Əgər bir çox ölkələrlə müqayisə etsək, ölkəmizdə bu sahədə görülən operativ işlər digərləri üçün nümunə olaraq qəbul edilir. Xalqımız hökumətin gördüyü tədbirlərə dözümlü yanaşmalı, qəbul olunan qərarları qeyd şərtsiz yerinə yetirməlidir. Ancaq və ancaq birlikdə və səbrlə bu problemin öhdəsindən gələcəyik. Hər kəs tək özünü yox, yaxınlarının, xalqının gələcəyini düşünməlidir".