Prezident İlham Əliyev öz davranışları, sadəliyi, səmimiyyəti ilə xalqa ləyaqətlə xidmət etmək nümunəsi göstərir
 
Azərbaycan rayonlarına mütəmadi səfərlər edən, ən müxtəlif obyektlərin, o cümlədən xidmət mərkəzlərinin, istehsal müəssisələrinin, yeni salınmış yolların, körpülərin, müasir dövrün tələbləri nəzərə alınmaqla inşa edilən səhiyyə obyektlərinin, məktəb binalarının açılışını edən Prezident İlham Əliyev yerli sakinlərin daim əhatəsində olub. Sevincli günlərdə, bayramlarda, rəsmi tədbirlərdə insanlarımızın sevincinə şərik olan dövlət başçısı ölkə vətəndaşlarının dar günündə də onların əsl himayəçisinə çevrilib. Prezident İlham Əliyev keçirdiyi görüşlərlə, imzaladığı fərman və sərəncamlarla, atdığı hər bir addımla da daim humanistliyini, qayğıkeşliyini nümayiş etdirib, səmimi davranışları ilə ənənəvi fəaliyyətini ortaya qoyub, hər kəs üçün əsl nümunəyə çevrilib. Ölkə rəhbərinin səmimi davranışlarına misal olaraq təkcə ötən il müşahidə etdiyimiz bir neçə məqamı xüsusi vurğulamaq yerinə düşər. 

Prezident İlham Əliyev və Birinci vitse-prezident Mehriban Əliyeva ötən il yanvarın 28-də Prezident Sarayında şəhid ailələri ilə görüşəndə xalqa arxalandığını, onların dəstəyinə güvəndiyini növbəti dəfə qeyd edib. Bildirib ki, xalqa xidmət etmək onun ən böyük vəzifəsidir, böyük şərəfdir. Prezident Sarayında şəhid ailələri ilə görüş zamanı ölkə başçısı İlham Əliyev ayağa durmaqda çətinlik çəkən ahıl şəhid anasına şəxsən yaxınlaşıb, onun qarşısında əyilərək birdəfəlik ödəməni almaq üçün istifadə olunan plastik kartı şəhid anasına təqdim edib. Bununla yanaşı, tribunada nitq söyləyərkən qəhərlənən şəhid atasına yaxınlaşan dövlətimizin başçısı stəkana su tökərək ona içirib, daha sonra qolundan tutaraq kürsünü tərk etməsinə yardımçı olub.


2019-cu il fevralın 1-də Bakı Konqres Mərkəzində Gənclər gününə həsr olunmuş respublika toplantısında iştirak edən Prezident İlham Əliyev tədbirdə çıxış edib tribunadan enən şəhid polkovnik-leytenant Raquf Orucovun oğlu Aqşin Oruclunu səmimiyyətlə qarşılayıb. Dövlət başçısı onu öz övladı kimi qucaqlayıb, dövlətin qayğısı ilə əhatə olunan şəhid oğlu ilə qürur duyduğunu öz səmimiyyəti ilə büruzə verib. Bundan başqa, ötən il fevralın 7-də zəlzələnin baş verdiyi Şamaxı rayonuna səfər edən, təbii fəlakətdən evləri ziyan görən sakinlərin əhatəsində olan, çətinliklərini, qarşılaşdıqları problemi yerindəcə müşahidə edən Prezident İlham Əliyev ahıl Saray nənənin onun əlini öpməsinə icazə verməyib. Əksinə, Prezident özü Saray nənənin əlini öpərək ona, onun timsalında böyüklərə ehtiramını bildirib.
 
 
Bu kimi bir çox hərəkətləri ilə milli-mənəvi dəyərlərimizə, böyüklərimizə, şəhid valideynlərinə hörmət və ehtiramını ifadə edən Prezident İlham Əliyev öz şəxsində daim əsl vətəndaşlıq, səmimiyyət, canıyananlıq nümunəsi göstərib. Bununla o, sadəliyini, səmimiyyətini, xalqına olan münasibətini ortaya qoyub. Cari il martın 4-də Tovuz rayonunda səfərdə olan ölkə başçısı İlham Əliyev "ASAN-Həyat” kompleksinin açılışında iştirak edib. Açılış mərasimindən sonra "ASAN xidmət” könüllüləri və əməkdaşları ilə görüşən Prezident İlham Əliyev əyləşəcəyi kreslo ilə bağlı irad bildirib. Prezident bəzəkli kreslo əvəzinə, sadə stulun gətirilməsinə göstəriş verib. Dövlət başçısı belə şeylərə lüzum olmadığını qeyd edib. Prezident bu sadəliyi ilə öz şəxsində hamıya, o cümlədən məmurlara əsl nümunə göstərib. Azərbaycan Prezidenti İlham Əliyev belə davranışları ilə Vətənə, millətə, xalqa, dövlətə ləyaqətlə xidmət etdiyini göstərib.

 
Millət vəkili Sahib Alıyev Prezident İlham Əliyevin "ASAN xidmət” könüllüləri və əməkdaşları ilə görüşdə nümayiş etdirdiyi sadəliyin, səmimiliyin bütün cəmiyyət üçün nümunə olduğunu dilə gətirib. Qeyd edib ki, ölkə başçısının bu davranışında həm də bir rəmzilik var: "Bizdə məsəl var deyirlər ki, oturduğun kreslo səni yox, sən oturduğun kreslonu şərəfləndirməlisən. Təəssüf ki, biz bəzən bunu əksini görürük. Bax, cənab Prezidentin kreslonu dəyişdirtməsi artıq dəfələrlə şahid olduğumuz kimi, bir tərəfdən onun xarakterindəki sadəlikdən irəli gəlir. Digər tərəfdən, fikrimcə, burada həm məmurlara, həm də cəmiyyətə bir ismarıc var. Məmurların diqqətinə çatdırılır ki, kiçik padşahlıq xislətində olanlar onların vəzifəsinin təşəxxüs satmaq, özünü yuxarıdan aparmaq, harınlıq etmək yox, xalqa xidmət olduğunu anlasınlar. Cəmiyyətə də göstərilir ki, bunu anlamayanlara, tutduğu vəzifənin, əyləşdiyi kreslonun mahiyyətini dərk etməyənlərə komandada yer yoxdur və olmayacaq. Beləliklə, mən belə fikirləşirəm ki, bu kreslo dəyişdirilməsi səhnəsində əslində bir rəmzilik vardı. O da bundan ibarət idi ki, harada dəbdəbəli həyat tərzinə üstünlük verən, tutduğu vəzifənin məsuliyyətini dərk etməyən məmurlar varsa, onlar sadə, təvazökar, həddini və işini bilənlərlə əvəzlənəcək”.




Siyasi şərhçi Azər Həsrət də Prezident İlham Əliyevin Tovuzda ASAN könüllüləri ilə görüşdə kreslo ilə bağlı davranışı bir çox insanlara ismarıc kimi dəyərləndirib: "Prezident bu hərəkəti ilə göstərdi ki, vəzifəsinə baxmayaraq xalqın ən sadə kəsimi – gənc insanlarla ünsiyyətdə belə özünü ayrı və fərqli hesab etmir. Prezident bu sadəliyini ilk dəfə nümayiş etdirmir. Onun bütün fəaliyyəti dövründə biz görmüşük ki, cənab Prezident ən sadə, ən adi davranışları ilə diqqət cəlb edib. Onun davamlı olaraq öz doğum gününü cəbhə bölgəsində - səngərdəki əsgərlərlə keçirdiyini də görmüşük. Yaxud da idman yarışları zamanı onunla şəkil çəkdirmək istəyən gənclərə şərait yaratması – yardımçı olması da daim diqqətimizi çəkib. Bu baxımdan cənab Prezidentin kreslo ilə bağlı sərgilədiyi davranış o silsilənin növbəti halqalarından biridir. Məncə, kreslo azarkeşi olan vəzifə sahibləri bundan özləri üçün nəticə çıxarmalıdır”.
 
Rufik İSMAYILOV
Kaspi.az