Balaken.info Tariximizin ən qanlı səhifələrindən biri olan Xocalı faciəsinin 33-cü ildönümü Balakən rayonunda silsilə anım tədbirləri ilə qeyd olunub. Bu çərçivədə Balakən Rayon İcra Hakimiyyətində rayonda məskunlaşmış Xocalı sakinləri ilə görüş təşkil edilib.  

Görüşdə Balakən Rayon İcra Hakimiyyəti başçısının birinci müavini Turan Dibirov çıxış edərək Xocalı faciəsinin Azərbaycan xalqına qarşı törədilmiş soyqırımı olduğunu vurğulayıb. O, bu qətliamın dünya tarixinə qanlı hərflərlə yazılmış ən dəhşətli vandalizm aktlarından biri olduğunu diqqətə çatdırıb. Həmçinin, Prezident İlham Əliyevin və Birinci vitse-prezident Mehriban xanım Əliyevanın Xocalıya səfərlərindən, Xocalı şəhərinin Ballıca kənd sakinləri ilə görüşlərindən, eləcə də dövlət başçısının Xocalı Soyqırımı Memorial Kompleksinin yaradılması haqqında imzaladığı Sərəncamdan bəhs edib.  

Qeyd edilib ki, 44 günlük Vətən müharibəsi Azərbaycan Ordusunun şanlı Qələbəsi ilə başa çatdı, 30 illik işğala son qoyuldu, ölkəmizin ərazi bütövlüyü bərpa edildi. Müzəffər Ali Baş Komandanın rəhbərliyi ilə bütün şəhidlərin, o cümlədən Xocalı qurbanlarının qisası alındı.  

Görüşdə RİHB aparatının Şəhid ailələri və veteranlarla iş şöbəsinin müdiri, qeyri-hökumət təşkilatlarının rəhbərləri çıxış edərək Xocalı soyqırımı ilə bağlı fikirlərini bölüşüblər.  

Sonda Xocalı sakinləri göstərilən diqqət və qayğıya görə Prezident İlham Əliyevə və Birinci vitse-prezident Mehriban Əliyevaya minnətdarlıqlarını bildiriblər.  

26 fevral 2025-ci il tarixində saat 17:00-da Xocalı faciəsinin qurbanlarının ruhu dərin ehtiramla yad edilib.

Şahidi olduğunuz hadisələri çəkib bizə göndərin! 7/24 whatsapp