“Füzuli beynəlxalq hava limanı Qarabağın hava qapısı olmaqla yanaşı, həm siyasi və iqtisadi, həm də hərbi əhəmiyyətə malik nəqliyyat qovşağıdır. Prezident İlham Əliyevin hava limanının tikintisi ilə bağlı qərar verməsindən sonra həmin ərazilərin qısa vaxt ərzində minalardan təmizlənməsi, işlərin sürətli və keyfiyyətli aparılması üçün İngiltərədən xüsusi minatəmizləyən avadanlıqların gətirilməsi hava limanının nəzərdə tutulduğundan da qısa vaxt ərzində bütün beynəlxalq standartlara cavab verən, ən ağır yüklü təyyarələrin belə qəbul edilməsinə hesablanmış eniş-uçuş zolağının istifadəyə verilməsi tarixi hadisədir”.

Bunu Pravda.az-a açıqlamasında Milli Məclisin deputatı Nəsib Məhəməliyev deyib. N.Məhəməliyev qeyd edib ki, yanvarın 14-də əsası qoyulmuş Füzuli hava limanının tikintisinin ilin sonuna qədər yekunlaşdırılması planlaşdırılırıb: “İşin düzgün təşkili və bir sıra xarici ölkələrdən alınmış avadanlıqların vaxtında çatdırılması, o cümlədən ərazilərin minalardan təmizlənməsi nəticəsində hava limanı ilk təyyarələrini daha tez, sentyabrın 5-də qəbul edib. Sentyabrın sonuna yaxın hava limanı istismara tam hazır olacaq və təhvil veriləcək. Bütün bunlar Azərbaycanın iqtisadi gücünün və qüdrətinin bariz nümunəsidir”.

Deputat vurğulayıb ki, cənab Prezident Böyük qayıdışla bağlı xüsusi planın olduğunu qeyd edib: “Böyük qayıdışın təşkili üçün, əlbəttə ki, ilk növbədə infrastruktur layihələri icra edilməlidir. Ona görə də rayonlararası yeni magistral tipli yolların çəkilməsi, Zəfər yolunun salınması, paralel olaraq tunellərdən ibarət daha qısa Füzuli-Şusa, həmçinin Bərdə-Ağdam, Laçın-Kəlbəcər, Tərtər-Ağdam və digər yolların salınması Böyük Qayıdış üçün önəmli faktorlardır. Həmin ərazilərdə kənd təsərrüfatının və iqtisadiyyatın inkişafı üçün beynəlxalq daşımalara ciddi ehtiyac var. Orada istehsal olunan sənaye, kənd təsərrüfatı məhsullarının xarici bazarlara çıxarılması üçün ən rahat və operativ nəqliyyat növü kimi Füzuli hava limanından geniş şəkildə istifadə ediləcək. Həmçinin hava limanı Qarabağ və ətraf rayonların turizm potensialının inkişafında önəmli rol oynayacaq. Bundan başqa, daxili daşımalar üçün də həmin hava limanının əhəmiyyəti son dərəcə böyükdür. Bütün dünya bir daha şahidi olur ki, Azərbaycan Ermənistandan fərqli olaraq dağıdıcı və barbar siyasəti həyata keçirmir. Ölkəmiz ermənilərin cəhənnəmə çevirdiyi əraziləri cənnətə çevirməklə məşğuldur. Şahidiyik ki, Qarabağda tikinti-quruculuq işləri davam etdirilir, regionun ekoloji təhlükəsizliyi təmin edilir. Bu, həmçinin Azərbaycan dövlətinin dünyada müsbət imicinin formalaşmasına xidmət edir. Nə qədər ki, Ermənistanla sülh müqaviləsi bağlanmayıb və bölgədə öz geosiyasi maraqlarına xidmət etmək üçün gərginliyi saxlamaq niyyətində olan qüvvələr var, əlbəttə ki, hərbi sahədə də infrastrukturun gücləndirilməsi vacibdir. Cəbhə bölgəsinə yüklərin operativ çatdırılması baxımından da Füzuli hava limanının əhəmiyyətini qeyd etmək lazımdır. Prezident İlham Əliyev və Birinci vitse-prezident Mehriban Əliyevanın işğaldan azad edilmiş rayonlara mütəmadi səfərləri və səfər çərçivəsində fərqli sahələr üzrə görülən işlər xalq tərəfindən xüsusi rəğbətlə qarşılanır. Bütün bunlar, həmçinin beynəlxalq birlik tərəfindən də izlənilir. Həmin bölgənin yaxın gələcəkdə dünyanın əlahiddə bir yaşıl zonasına çevriləcəyi şübhə doğurmur. Qısa zamanda ərsəyə gəlmiş Füzuli beynəlxalq hava limanı Prezident İlham Əliyevin apardığı siyasətin əsl mahiyyətini göstərir".