» » "Düşmən daim Azərbaycan Ordusunun gücünü öz üzərində hiss etməlidir" - Deputat

"Düşmən daim Azərbaycan Ordusunun gücünü öz üzərində hiss etməlidir" - Deputat


Azərbaycan Respublikası ilə Türkiyə Respublikası arasında bağlanmış hərbi sahədə əməkdaşlıq haqqında sazişə əsasən, Bakıda iyunun 28-də başlayan "Mustafa Kamal Atatürk – 2021" birgə döyüş atışlı taktiki təlimləri davam edir.

Bununla bağlı Sonxeber.az-a danışan deputat Nəsib Məhəməliyev bildirib ki, Azərbaycan - Türkiyə birgə təlimləri, iki qardaş ölkənin Prezidentləri İlham Əliyev və Rəcəb Tayyib Ərdoğanın imzaladığı tarixi Şuşa bəyannaməsinə əsasən, Silahlı Qüvvələrin təsdiq etdiyi qrafikə uyğun keçirilir:

"Təlimlərin əsas məqsədi müxtəlif coğrafi şəraitlərdə, ayrı-ayrı qoşun növlərinin, şəxsi heyətin döyüş təcrübəsinin təkmilləşdirilməsidir. Ali Baş Komandan İlham Əliyev Gülüstan sarayında bir qrup hərbçilər qarşısında çıxış edərkən, müharibədən sonra regionda yaranmış yeni situasiyanı şərh edərkən bildirdi ki, dayanıqlı və uzunmüddətli sülhü təmin etmək üçün Silahlı Qüvvələrimizi modernləşdirməyi, yenidən formalaşdırmağı davam etdirəcəyik. Azərbaycan Ordusunu Türkiyə Ordusuna, NATO standartlarına uyğunlaşdıracağıq. Bunun üçün, təbii olaraq, ən müasir texnologiyalara uyğun istehsal olunmuş yeni silahlar alınmalı və real döyüş şəraitinə uyğun təlimlərdə sınaqdan çıxarılmalıdır. Son təlimlərdə Azərbaycan və Türkiyənin hərbi hava qüvvələri iştirak edirdilər. Televiziya kanallarının milli təyyarəçilərimizin iştirak etdiyi təlimlərdən hazırladığı reportajlarda onların şərti düşmənin obyektlərini dəqiqliklə məhv etdiyini müşahidə etdik. Bu da hərbi təyyarəçilərimizin yüksək peşəkarlığının göstərisidir".

Deputatın sözlərinə görə, nə qədər ki, Ermənistanla sülh müqaviləsi bağlanmayıb və yerləşdiyimiz regionda müxtəlif supergüclərin maraqları toqquşur, ordumuzun gücləndirilməsi istiqamətində addımlar atılmalıdır:

"Güclü ordu ölkəmizin müstəqilliyinin təminatçısı, təhlükəsizliyin qarantı deməkdir. Təlimlərin NATO-nun ikinci ən qüdrətli ordusu, dünyanın bir çox qaynar nöqtələrində özünü təsdiq etmiş Türk Ordusu ilə birgə keçirilməsi də olduqca əhəmiyyətlidir. Düşünürəm ki, birgə təlimlər mütəmadi olaraq keçirilməli, düşmən daim Azərbaycan Ordusunun gücünü öz üzərində hiss etməlidir. Necə deyərlər, sülh istəyirsənsə, müharibəyə hazır olmalısan".

Qullar kəndində səyyar qəbul keçirilib