Yeni Azərbaycan partiyasının 7-ci qurultayı Azərbaycanın ictimai-siyasi həyatında əlamətdar hadisədir. YAP yarandığı gündən Ümummilli Lider Heydər Əliyevin rəhbərliyi ilə Azərbaycan dövlətinin qurulmasında, vətəndaş müharibəsinin qarşısının alınmasında, müstəqilliyimizin möhkəmlənməsində xüsusi rolu olmuşdur. Eyni zamanda nəzərə almaq lazımdır ki, həyat davam edir, hər bir sahədə olduğu kimi siyasi partiyalarda da yeniləşmə, nəsillərin əvəzlənməsi prosesi getməlidir. Gənc kadrların ictimai-siyasi proseslərə cəlb olunması labüddür. Bu baxımdan partiyanın sədri Prezident İlham Əliyevin rəhbərliyi ilə aparılan və cəmiyyətin bütün sahələrini əhatə edən islahatlar Yeni Azərbaycan partiyasından da yan keçmir.

Partiyamızın Sədri cənab Prezident qurultayda giriş və yekun nitqində yaxın keçmişimiz, mövcud vəziyyət və gələcəklə bağlı, dövlətin apardığı xarici, daxili siyasətin mahiyyətini ictimaiyyətin diqqətinə çatdırdı. Ölkəmizin qarşılaşdığı problemlər və onların həlli istiqamətində aparılan işlərlə xalqı məlumatlandırdı. Yeni yaranmış reallıqları nəzərə almaq şərti ilə partiyanın yeni proqramının hazırlanması ilə bağlı tapşırıq verdi. 

Siyasi şuranın ləğv olunması, əvəzində idarə heyəti üzvlərinin sayının artırılması, düşünürəm ki, cəmiyyətin sosial sifarişlərinin öyrənilməsi, ölkənin qarşısında duran problemlərin vaxtında və keyfiyyətli həll olunması  baxımından daha effektiv fəaliyyət göstərəcəkdir.