2017-ci il fevral aynın 21-də Prezident İlham Əliyevin sərəncamı ilə Heydər Əliyev Fondunun prezidenti, Milli Məclisin deputatı Mehriban Əliyevanın respublikamızın Birinci vitse-prezidenti təyin edilməsi Azərbaycan ictimaiyyətini sevindirən bir hadisə oldu. Bu, ictimaiyyət tərəfindən təqdir olundu və hər bir vətəndaşımız əmin idi ki, Mehriban Əliyeva tarixin, zamanın, dövlətimizin onun üzərinə qoyduğu bu məsul vəzifəni də layiqincə və böyük nailiyyətlərlə həyata keçirəcək.

Mehriban Əliyevanın buna qədər Heydər Əliyev Fondunun prezidenti, Milli Məclisin deputatı, Azərbaycan Mədəniyyətinin Dostları Fondunun rəhbəri kimi gördüyü işlər ictimaiyyətə yaxşı tanış idi. 2004-cü ildə yaradılan və həyata keçirdiyi proqramlarla qısa müddətdə respublikamızı dünyada tanıdan, Azərbaycan həqiqətlərini inamla beynəlxalq ictimaiyyətə çatdıran, milli mədəniyyətimizin təbliğinə layiqincə xidmətlər göstərən, insanların ümid yerinə çevrilən Heydər Əliyev Fondunun geniş spektri əhatə edən fəaliyyətinin əsasında məhz Mehriban Əliyevanın əzmkarlığı, təşəbbüskarlığı dayanır. Gördüyü işlərlə Ulu Öndər Heydər Əliyevin ideyalarının həyata vəsiqə almasına vəsilə olan fond məhz Mehriban Əliyevanın sayəsində insanlara kömək etməyi, problemlərinin həllində dəstək olmağı özünün başlıca fəaliyyət prioritetinə çevirib. Xeyriyyəçiliyi, uşaqlara, tənha və yaşlılara, həssas qruplara qayğı və köməyi, müxtəlif sosial və humanitar aksiyalar keçirməyi fond öz fəaliyyətinin prioritet istiqamətləri hesab edir.

Təsadüfi deyil ki, ötən ilin fevral-mart aylarında Azərbaycanda koronavirus infeksiyasının qeydə alınmasından sonra ilk sosial layihələr Mehriban Əliyevanın təşəbbüsü ilə həyata keçirilmişdi. Məlum olduğu kimi, sərt karantin dövründə bir sıra məhdudiyyətlər tətbiq olunmuş, xüsusi risk qrupuna daxil olan vətəndaşların evdən çıxmaları qadağan olunmuşdu. Həmin günlərdə yaşlı və tənha vətəndaşların köməyinə ilk olaraq Heydər Əliyev Fondu gəldi. Mehriban Əliyevanın göstərişləri ilə Heydər Əliyev Fondu tərəfindən on minlərlə ailəyə ərzaq bağlamaları göndərildi.

Mehriban Əliyevanın Birinci vitse-prezident kimi ilk vaxtlardan ortaya qoyduğu fəaliyyət  sosial məsələləri əhatə etmişdi. Birinci vitse-prezident xanım Mehriban Əliyevanın sədrliyi ilə keçirilən müşavirə Bakı və Sumqayıt şəhərlərinin yataqxanalarında müvəqqəti məskunlaşmış məcburi köçkün ailələrinin yeni mənzillərə köçürülməsinə həsr olunmuşdu. Qısa müddətdə “Qəzalı vəziyyətdə olan binalarda məskunlaşmış məcburi köçkün ailələrinin yeni mənzillərlə təmin olunması” layihəsi çərçivəsində minlərlə məcburi köçkün ailəsi yeni mənzillərlə təmin edilmişdi.

Mehriban Əliyevanın təşəbbüsü ilə həyata keçirilən başqa bir sosial layihə 2016-cı ilin Aprel döyüşlərində yaralanmış əsgər və zabitlərin yüksək texnologiyalı protezlərlə təmin edilməsi ilə bağlı idi. Layihə çərçivəsində Aprel döyüşlərində sağlamlıqlarını itirmiş hərbçilərimiz yüksək texnologiyalara əsaslanan protezlərlə təmin olundular. Ən mühümü odur ki, bu zaman əlil olmuş hərbçilərimiz üçün protezlər onların hər birinə fərdi yanaşma əsasında hazırlanmışdı.

2020-ci il Azərbaycan üçün tarixi dövr oldu. Prezident İlham Əliyevin Ali Baş Komandanlığı ilə qəhrəman Ordumuz torpaqlarımızı işğaldan azad edərək dövlətçilik tariximizin şərəfli səhifəsini yazdı. Azərbaycan xalqı 44 günlük müharibədə öz Prezidentinin qətiyyətini, yenilməzliyini gördü. Elə bu amil bizi sürətlə böyük Qələbəyə apardı. Eyni zamanda Azərbaycan xalqı müharibə günlərində və Qələbədən sonrakı dövrdə bir daha Birinci vitse-prezident Mehriban Əliyevanın yüksək vətənpərvərlik hisslərinin və daşıdığı dövlətçilik ideallarının şahidi oldu. Şəhər və rayonlarımızın azad olunduğu günlərdə xalqa təbrikləri, o cümlədən Prezident İlham Əliyevlə birlikdə azad olunmuş rayonlarımıza səfərlər etməsi Mehriban Əliyevanın vətən sevgisinin göstəriciləridir. Mehriban Əliyevanın təşəbbüsləri ilə Heydər Əliyev fondu bu gün Qarabağın yenidən qurulmasında da fəaliyyətə başlayıb. Artıq Fond tərəfindən azad olunmuş ərazilərdəki tarixi və dini abidələrimizin bərpası üzrə layihəyə start verilib. Şuşa şəhərində və Ağdam rayonunda dağıntılara məruz qalmış dini ibadət yerlərinin bərpası üzrə müvafiq işlərə artıq başlanılıb.

Eyni zamanda Mehriban Əliyevanın rəhbərlik etdiyi Heydər Əliyev Fondu bu gün  Vətən müharibəsində iştirak edənlərə dövlət qayğısı siyasətinə dəstək missiyasını da davam etdirir. Bu günlərdə bir neçə müharibə qazisinin müalicədən ötrü Türkiyəyə göndərilməsi qəhrəman hərbçilərimizin normal həyata qayıdışı üçün Mehriban Əliyevanın göstərdiyi həssas münasibətin təsdiqi oldu.

Azərbaycan öz inkişafının yeni mərhələsinə qədəm qoyur. Bu inkişafı şərtləndirən amillər Azərbaycanın ərazi bütövlüyünü bərpa etməsi və pandemiyanın öz sonuna yaxınlaşmasıdır. Prezident İlham Əliyev növbəti 10 ili əhatə edən milli prioritetləri də təsdiq edib. Bu mənada qarşıda bizi həm məsuliyyətli, həm də şərəfli bir dövr gözləyir. Şübhə yoxdur ki, Birinci vitse-prezident Mehriban Əliyeva öz missiyası ilə bu dövrün inkişaf proseslərinə özünün layiqli töhfələrini verəcək.

Vitse-prezidentlik institutu Azərbaycan üçün yeni bir təcrübə olsa da, Mehriban Əliyeva ilk gündən bu vəzifəni layiqincə yerinə yetirir. Gördüyü işlərlə, həyata keçirdiyi sosial layihələrlə o, idarəçilikdə daha səmərəli fəaliyyət üsullarının tətbiqi, vətəndaşlar qarşısında dövlətin öhdəliklərinin keyfiyyətli və çevik icrasının yeni mexanizminin qurulması baxımından vitse-prezidentlik institutunun effektivliyini təsdiq etdi.

 

Nəsib MƏHƏMƏLİYEV,

Milli Məclisin deputatı