Balaken.info Balakən Rayon İcra Hakimiyyətinin rəsmi Facebook səhifəsinə istinadən xəbər verir ki, 30 iyul 2026-cı il tarixində Balakən şəhərində yerləşən Heydər Əliyev adına Mədəniyyət və İstirahət Parkında "Memarlıq və Şəhərsalma İli" çərçivəsində rayonun sənətkarları və kiçik ailə biznesi ilə məşğul olan təsərrüfatçılarla görüş keçirilib.

Tədbir çərçivəsində yerli sənətkarların hazırladıqları əl işləri və müxtəlif məhsullardan ibarət sərgi təşkil olunub. Rayon İcra Hakimiyyətinin başçısı Natiq Ağayev tədbiri giriş sözü ilə açaraq sərgiyə baxış keçirib, ölkədə və Balakən rayonunda sahibkarlığın inkişafı üçün yaradılan əlverişli şəraitdən, xüsusilə kiçik və ailə biznesinin dəstəklənməsi istiqamətində həyata keçirilən tədbirlərdən danışıb.

Görüş zamanı kiçik sahibkarlığın inkişafına mühüm töhfə verən ABAD layihəsinin fəaliyyəti müzakirə olunub. Mövcud ABADçıların fəaliyyətinin təhlil edildiyi tədbirdə istifadəsiz qalan 1 süd məhsulları istehsalı və 3 cem-mürəbbə istehsalı konteynerinin yeni təsərrüfatçılara təqdim olunması ilə bağlı müvafiq tövsiyələr verilib.

Bununla yanaşı, rayonun sənətkarlarının bir məkanda fəaliyyət göstərməsi, məhsullarını nümayiş etdirməsi və məşğulluqlarının artırılması məqsədilə turizm potensialı yüksək olan park ərazisində xüsusi binanın ayrılması təklif olunub.

Tədbirdə çıxış edən ABAD Mərkəzinin Layihələrin İnkişafı Departamentinin müdir müavini Ləman Şirinova yaradılan şəraitə görə rayon rəhbərliyinə təşəkkürünü bildirərək, gələcəkdə Balakən rayonunda sənətkarlığın və ailə biznesinin inkişafına daha geniş dəstək göstəriləcəyini vurğulayıb.

Şəki Keramika Mərkəzinin direktor müavini Rüfət Əliyev isə keramika sənətinin inkişafı istiqamətində Balakən sənətkarları ilə əməkdaşlığa hazır olduqlarını diqqətə çatdırıb.

Sonda tədbir iştirakçıları ilə fərdi görüşlər keçirilib, müraciət edən hər bir təsərrüfatçının fəaliyyət istiqaməti və potensialı qiymətləndirilərək onların təklif və müraciətləri dinlənilib.

Qeyd edək ki, bu cür görüşlərin keçirilməsi rayonda sənətkarlığın inkişafı, ailə biznesinin genişləndirilməsi və yeni məşğulluq imkanlarının yaradılması baxımından mühüm əhəmiyyət daşıyır.

Şahidi olduğunuz hadisələri çəkib bizə göndərin! 7/24 whatsapp