22 İyul – Milli Mətbuat və Jurnalistika Günü münasibətilə Şəki-Zaqatala Regional Təhsil İdarəsinin təşkilatçılığı, Elm və Təhsil İşçiləri Həmkarlar İttifaqı Şəki Rayon Komitəsinin dəstəyi ilə şimal-qərb bölgəsində fəaliyyət göstərən media nümayəndələri ilə görüş keçirilib.

Balaken.info xəbər verir ki, tədbirdə Şəki-Zaqatala Regional Təhsil İdarəsinin müdiri Günay Mahmudova, müdir müavini Hafiz Pənahov, Elm və Təhsil İşçiləri Həmkarlar İttifaqı Şəki Rayon Komitəsinin sədri Ziyafət Xasiyeva, idarənin struktur bölmə rəhbərləri və media təmsilçiləri iştirak ediblər.

Tədbirdə çıxış edən Günay Mahmudova jurnalistləri peşə bayramı münasibətilə təbrik edərək, bölgənin təhsil sahəsində əldə olunan nailiyyətlərin ictimaiyyətə çatdırılmasında göstərdikləri dəstəyə görə onlara təşəkkürünü bildirib. O, son bir ildə həyata keçirilən işlər, müəllimlərin peşəkar inkişafı, şagird nailiyyətləri, qəbul imtahanlarının nəticələri, eləcə də təhsil müəssisələrində aparılan təmir-tikinti işləri barədə məlumat verərək, media ilə əməkdaşlığın gələcəkdə də davam etdiriləcəyini vurğulayıb.

Daha sonra çıxış edən Elm və Təhsil İşçiləri Həmkarlar İttifaqı Şəki Rayon Komitəsinin sədri Ziyafət Xasiyeva jurnalistlərin təhsil sahəsinin işıqlandırılmasındakı rolunu yüksək qiymətləndirib. O, "Əkinçi" qəzeti ilə əsası qoyulan milli mətbuat ənənələrinin bu gün də media nümayəndələri tərəfindən uğurla davam etdirildiyini qeyd edib və bütün qələm sahiblərinə fəaliyyətlərində uğurlar arzulayıb.

Media nümayəndələri göstərilən diqqətə görə təşəkkür edərək, qarşılıqlı əməkdaşlıqdan məmnun olduqlarını bildiriblər.

Tədbirin sonunda media nümayəndələrinə təşəkkürnamələr və hədiyyələr təqdim olunub, xatirə şəkli çəkdirilib.

Şahidi olduğunuz hadisələri çəkib bizə göndərin! 7/24 whatsapp