Balakən Rayon İcra Hakimiyyətinin başçısı Natiq Ağayev sel nəticəsində ciddi ziyan dəymiş içməli su mənbələrinə baxış keçirib.

Balaken.info Balakən Rayon İcra Hakimiyyətinin rəsmi Facebook səhifəsinə istinadən xəbər verir ki, bu gün rayon icra hakimiyyətinin başçısı Natiq Ağayev, rayonun hüquq-mühafizə orqanlarının rəhbərləri ilə birlikdə Balakən şəhərini və ətraf kəndləri içməli su ilə təmin edən su mənbələrində olub.

Rayon rəhbəri ərazidə aparılan təmir-bərpa işlərinin gedişi ilə yerində tanış olub, məsul şəxslərlə mövcud vəziyyəti müzakirə edib.

Bildirilib ki, son günlər yağan intensiv yağışlar və sel nəticəsində içməli su mənbələri, su xətləri və borular ciddi zərər görüb. Dəymiş ziyanın miqyası böyük olduğundan bərpa işləri aidiyyəti qurumlar tərəfindən fasiləsiz şəkildə davam etdirilir.

Balakən rayon icra hakimiyyətinin başçısı Natiq Ağayev fəsadların qısa müddətdə aradan qaldırılması, içməli su təchizatının bərpasının sürətləndirilməsi və əhalinin dayanıqlı şəkildə içməli su ilə təmin olunması məqsədilə aidiyyəti qurumların rəhbərlərinə müvafiq tapşırıq və tövsiyələr verib.

Hazırda ərazidə bərpa işləri davam etdirilir və içməli su təchizatının ən qısa zamanda tam bərpa olunması istiqamətində zəruri tədbirlər görülür.

Şahidi olduğunuz hadisələri çəkib bizə göndərin! 7/24 whatsapp