Balakən rayonunda yağan intensiv yağışlar İtitala kəndində ciddi fəsadlara səbəb olub. Güclü leysanlar nəticəsində Katex çayı məcrasından çıxaraq yaşayış evlərinə, həyətyanı sahələrə və şəxsi təsərrüfatlara dolub.

Balaken.info xəbər verir ki, sel suları nəticəsində kənd sakinlərinə məxsus mal-qara, toyuq-cücə və arı ailələrinin bir hissəsi tələf olub. Həmçinin əkin sahələrinə, meyvə bağlarına və digər kənd təsərrüfatı sahələrinə ciddi ziyan dəyib. Sakinlər öz imkanları hesabına əmlaklarını və təsərrüfatlarını xilas etməyə çalışıblar.

Sel-fəlakətinin yaratdığı vəziyyətlə tanış olmaq üçün Balakən Rayon İcra Hakimiyyətinin başçısı Natiq Ağayev İtitala kəndinə gələrək hadisə yerinə baxış keçirib. Rayon rəhbəri sakinlərlə görüşüb, onların müraciətlərini dinləyib və dəyən ziyanın aradan qaldırılması istiqamətində aidiyyəti qurumlara müvafiq tapşırıqlar verib.

Qeyd edək ki, son günlər yağan aramsız yağışlar nəticəsində Balakən rayonunun bir neçə kəndində sel-fəlakəti baş verib. İtitala kəndində isə Katex çayının məcrasından çıxması nəticəsində evlər və şəxsi təsərrüfatlar su altında qalıb, bir çox ailəyə maddi ziyan dəyib.

Hazırda ərazidə selin nəticələrinin aradan qaldırılması istiqamətində işlər davam etdirilir. Aidiyyəti qurumlar tərəfindən zərərin qiymətləndirilməsi aparılır, sakinlərə lazımi dəstəyin göstərilməsi üçün müvafiq tədbirlər görülür.

Şahidi olduğunuz hadisələri çəkib bizə göndərin! 7/24 whatsapp