13 iyun 2026-cı il tarixində Balakən rayonunun Qullar kəndində yerləşən Eyvaz Əliqayev adına Qullar 2 nömrəli kənd tam orta məktəbində “Son zəng” tədbiri keçirilib.

Tədbirdə məktəbin pedaqoji kollektivi, valideynlər, məzunlar və ictimaiyyət nümayəndələri iştirak ediblər.

Əvvəlcə Azərbaycanın Dövlət Himni səsləndirilib, Vətən uğrunda canlarından keçən şəhidlərin əziz xatirəsi bir dəqiqəlik sükutla yad edilib.

Tədbiri giriş sözü ilə açan məktəbin direktoru Tamella Mahamaxanova məzunları həyatlarının ən yaddaqalan günlərindən biri münasibətilə təbrik edib, onlara gələcək təhsil və əmək fəaliyyətlərində uğurlar arzulayıb. Direktor bildirib ki, məktəb illəri gənclərin şəxsiyyət kimi formalaşmasında mühüm rol oynayır və bu gün məzunlar yeni həyat mərhələsinə qədəm qoyurlar.

Tamella Mahamaxanova çıxışında ölkə Prezidenti cənab İlham Əliyevin rəhbərliyi ilə son illərdə təhsil sahəsinə göstərilən xüsusi diqqət və dövlət qayğısından da bəhs edərək bildirib ki, bu gün Azərbaycanda təhsilin keyfiyyəti durmadan artır, məktəblərin maddi-texniki bazası gücləndirilir, müasir tədris metodları tətbiq olunur. Bu, gələcək nəslin bilikli, vətənpərvər və müasir düşüncəli yetişməsinə mühüm zəmin yaradır.

Direktor həmçinin Elm və Təhsil Naziri cənab Emin Əmrullayevin rəhbərliyi ilə ölkədə təhsilin keyfiyyətinin yüksəldilməsi, müəllim peşəsinin nüfuzunun artırılması və ümumilikdə təhsil infrastrukturunun inkişafı istiqamətində həyata keçirilən məqsədyönlü və sistemli islahatlardan da danışıb. Qeyd olunub ki, bu islahatlar nəticəsində təhsildə şəffaflıq artırılıb, müəllimlərin bilik və bacarıqları obyektiv qiymətləndirilir, eyni zamanda innovativ yanaşmaların tətbiqi genişlənir.

Çıxışında Şəki-Zaqatala Regional Təhsil İdarəsinin müdiri Günay Mahmudovanın da bölgədə təhsilin inkişafına verdiyi töhfələr xüsusi qeyd olunub. Bildirilib ki, onun rəhbərliyi ilə regionda bir sıra uğurlu layihələr həyata keçirilir, məktəblərin idarəetmə mexanizmi təkmilləşdirilir və müəllim-şagird münasibətlərində müasir yanaşmalar tətbiq edilir.

Sonra müəllimlər və valideynlər məzunlara xoş arzularını çatdıraraq, onlara gələcək həyatlarında uğurlar arzulayıblar. Məzunlar isə məktəb illəri ilə bağlı xatirələrini bölüşüb, müəllimlərinə minnətdarlıqlarını ifadə ediblər.

Tədbir şagirdlərin hazırladığı bədii proqram, musiqi nömrələri və “Son zəng”in səsləndirilməsi ilə başa çatıb.

Qeyd edək ki, 2025–2026-cı tədris ilinin başa çatması münasibətilə keçirilən “Son zəng” tədbiri məktəbin məzunları üçün unudulmaz anlarla yadda qalıb.

Şahidi olduğunuz hadisələri çəkib bizə göndərin! 7/24 whatsapp