Balaken.info - nun məlumatına görə iyunun 14-ü axşam saatlarından başlayaraq Balakən rayonunda qeyri-sabit hava şəraiti hökm sürüb. Saat 22 radələrindən etibarən rayonda güclü külək əsib, leysan xarakterli yağış yağıb.

Güclü külək nəticəsində Balakənin bəzi ərazilərində ağaclar qırılıb, elektrik və rabitə xətlərində qırılmalar, qısaqapanmalar baş verib. Nəticədə Balakən rayonunun təxminən 80 faiz ərazisində elektrik enerjisinin verilməsində fasilə yaranıb.

Dağlıq ərazilərə yağan leysan yağışları səbəbindən Balakən çayında və digər dağ çaylarında suyun səviyyəsi artıb.

Gecə saatlarından etibarən Balakən Paylayıcı Elektrik Şəbəkəsinin əməkdaşları əraziyə ezam olunaraq, baş vermiş qəzaların aradan qaldırılması istiqamətində təcili tədbirlər görməyə başlayıblar. Səhər saatlarına kimi əksər ərazilərdə enerji təchizatı bərpa olunub.

Hazırda rayonda qeyri-sabit hava şəraiti davam edir və fasilələrlə yağış yağmaqda davam edir. Balakən rayonunun enerji təminatı ilə bağlı bərpa və təmir işləri davam etdirilir.