Bu gün – 9 iyun tarixində – 2023-cü ildə Azərbaycan Silahlı Qüvvələri tərəfindən Qarabağda aparılan 24 saatlıq lokal antiterror əməliyyatı zamanı şəhidlik zirvəsinə ucalan Balakən rayonunun igid oğlu, vətənin mərd müdafiəçisi Köklərov Sərxan Eyvaz oğlunun cənnətdə qeyd olunan 38-ci doğum günü münasibətilə onun doğma yurdu Balakəndə anım tədbiri keçirildi.

Tədbir Balakən rayonunun Şəhidlər Xiyabanında təşkil olunaraq yüksək ehtiram və dərin hörmət ruhunda baş tutdu. Tədbirdə şəhid ailələri, qazilər, Balakən Rayon İcra Hakimiyyətinin nümayəndələri, din xadimləri, Zaqatala və Şəki rayonlarından gələn şəhid anaları, eləcə də Tülü və Nəsimi kənd tam orta məktəblərinin müəllim və şagird kollektivi, QHT nümayəndələri və digər ictimaiyyət nümayəndələri iştirak etdilər.

Tədbir Azərbaycan Respublikasının Dövlət Himninin səsləndirilməsi və şəhidlərin müqəddəs xatirəsinin bir dəqiqəlik sükutla anılması ilə başladı. Ardınca çıxış edən natiqlər qəhrəman şəhidimiz Sərxan Köklərovun keçdiyi döyüş yolu, göstərdiyi şücaət, vətənə sədaqəti və fədakarlığı haqqında danışaraq, onun əziz xatirəsinin hər zaman yaşadılacağının altını çəkdilər. Qeyd olundu ki, o, Balakənin 2023-cü ildə antiterror əməliyyatında şəhid olan sonuncu şəhidi kimi tarixə yazılıb.

Məktəblilər tərəfindən şəhid Sərxana həsr olunmuş vətənpərvərlik ruhunda şeirlər səsləndirildi. Bu hissə tədbirə xüsusi duyğusal və qürurverici ab-hava bəxş etdi.

Tədbirin sonunda şəhidin qardaşı Absələddin Köklərov çıxış edərək tədbir iştirakçılarına və ailələrinə göstərilən diqqətə görə Köklərovlar ailəsi adından minnətdarlığını bildirdi. Ardınca din xadimi Rövşən İbrahimov tərəfindən Qurani-Kərimdən ayələr oxundu, şəhidimizin ruhuna dualar edildi. Bütün iştirakçılar “Amin” deyərək dualara qoşuldular.

Tədbirin ikinci hissəsi dini mövlüd mərasimi şəhidin ailəsinin yaşadığı ünvanda davam etdi. Burada da şəhidimizin ruhu yad olundu, Quran oxundu, onun xatirəsi ehtiramla anıldı.

Qəhrəmanlar Unudulmur – Şəhidlər Ölməz, Vətən Bölünməz!
Sərxan Köklərovun adı Azərbaycan xalqının yaddaşına şərəf, qürur və rəşadət simvolu kimi həkk olunub. Onun kimi igidlərin fədakarlığı sayəsində bu torpaq azaddır və daim qorunur. Allah bütün şəhidlərimizə rəhmət etsin. Onların ruhu qarşısında baş əyirik.

Balaken.info 
İbrahim Şıxməmmədov