Balaken.info xəbər verir ki, son günlərdə ölkə ərazisində müşahidə olunan qeyri-sabit hava şəraiti ilə əlaqədar olaraq Balakən rayonunda da təhlükəsizlik tədbirləri gücləndirilib. Daxili İşlər Nazirliyinin göstərişi ilə Balakən Rayon Polis Şöbəsinin əməkdaşları gücləndirilmiş iş rejiminə keçərək, vətəndaşların təhlükəsizliyini təmin etmək və hər hansı fövqəladə halın qarşısını almaq üçün fasiləsiz fəaliyyət göstərirlər.

Daxili İşlər naziri general-polkovnik Vilayət Eyvazovun tapşırığı ilə ölkənin bütün bölgələrində olduğu kimi, Balakəndə də DİN-in yerli strukturları qeyri-sabit hava şəraitinə hazırlıqlı olmalıdır. Nazirliyin ümumi göstərişi ilə polis və yol patrul xidmətləri təkcə hüquq-mühafizə tədbirlərini deyil, həm də sosial yönümlü yardımları həyata keçirməlidirlər.

Daxili İşlər naziri general-polkovnik Vilayət Eyvazovun son aylarda Balakənə səfəri zamanı da bu istiqamətdə tapşırıqlar verilmiş, ictimai təhlükəsizliyin təmin olunması, vətəndaşlarla operativ kommunikasiya və onların müraciətlərinə çevik cavab verilməsi üçün xüsusi göstərişlər verilmişdir.

Balakən Rayon Polis Şöbəsinin rəisi polis polkovniki Çingiz Aslanovun rəhbərliyi altında rayon ərazisində bütün xidmət qurumları tam hazırlıq vəziyyətinə gətirilib. Yol-nəqliyyat hərəkətinin təhlükəsizliyinin təmin olunması, yolların nəzarətdə saxlanılması, çətin şəraitdə qalan vətəndaşlara operativ yardım göstərilməsi istiqamətində zəruri tədbirlər həyata keçirilir.

Rayonun mərkəzi küçələrində və ucqar ərazilərində patrul xidmətləri gücləndirilib, yol təhlükəsizliyi və vətəndaşların rahat hərəkəti üçün intensiv nəzarət tədbirləri görülür. Eyni zamanda, ictimai yerlərdə nəzarət gücləndirilib, fövqəladə vəziyyətlərin qarşısının alınması üçün digər müvafiq dövlət orqanları ilə əməkdaşlıq artırılıb.

Balakən YPX bölməsinin rəisi İlkin Hümbətovun rəhbərliyi ilə yol patrul xidmətinin əməkdaşları əsas yolları nəzarətdə saxlayır, çökəkli yollarla bağlı sürücülərə xəbərdarlıqlar edir, eyni zamanda qəza risklərinin qarşısının alınması üçün maarifləndirici tədbirlər aparırlar.Sərnişin daşıyan nəqliyyat vasitələrinin hərəkətinin təhlükəsizliyi diqqət mərkəzində saxlanılır. Avtobusların marşrutları boyunca nəzarət gücləndirilib, sürücülərə ehtiyatlı davranmaqla bağlı xəbərdarlıq və tövsiyələr verilir.

Hazırda Balakən rayonunda vətəndaşlar polis əməkdaşlarının dəstəyindən və xidmətindən məmnun olduqlarını bildirirlər. Çətin hava şəraitinə baxmayaraq, küçələrdə, yol kənarlarında, təhsil və səhiyyə ocaqları ətrafında polis və YPX əməkdaşlarının fəaliyyəti təhlükəsizliyin təmin edilməsində əsas rol oynayır.

Balakən Rayon Polis Şöbəsi, YPX bölməsi və ümumilikdə Daxili İşlər Nazirliyi vətəndaşların təhlükəsizliyi, rahatlığı və məmnuniyyəti naminə fasiləsiz çalışmaqda davam edir.