“Dövlətini sevən, ona etimad göstərən məmur vəzifəsindən sui-istifadə hallarına yol verməməlidir”

“Ölkə başçısının təbiri ilə desək, “kasıbların axırıncı puluna göz dikməməlidir, sahibkarlığın inkişafına maneçilik törətməməlidir”


“Dövlət başçısı İlham Əliyev Saatlı və Biləsuvar rayonlarının yeni icra başçılarına yerlərdə vəzifələrini necə yerinə yetirmələri, əhali ilə davranış qaydaları, problemlərin öyrənilməsi və həlli yolları barədə ətraflı şəkildə tövsiyələrini verdi”.

Bunu “Sherg.az”a millət vəkili Nəsib Məhəməliyev deyib. 

Deputat bildirib ki, ölkə rəhbəri yerli idarəetmə sistemində mövcud olan məmur özbaşınalığı, bəzi bölgələrdə məmur-vətəndaş münasibətlərində birincilərin feodal təfəkkürü sərgiləməsi barədə tənqidi fikirlər səsləndirdi: 

“Eyni zamanda kadr təyinatlarında subyektiv yanaşmalar, sahibkarlara yaradılmış süni əngəllər və digər neqativ hallar barədə həm onları, həm də ictimaiyyəti növbəti dəfə xəbərdar etdi. Təyinatların bu formatda şəffaf, ictimaiyyətin gözü qarşısında aparılmasının əhəmiyyəti olduqca böyükdür. XXI əsr informasiya əsridir və gizlin heç nə yoxdur.

Əfsuslar olsun ki, ən yüksək səviyyədə dövlət başçısının etdiyi xəbərdarlıqlara baxmayaraq, hələ də nəticə çıxarmayan məmurlar kifayət qədərdir.

Cəmiyyət dəyişməlidir. Dövlətini sevən, ona etimad göstərən, Prezidentə sədaqətlə xidmət etmək istəyən hər bir məmur vəzifəsindən sui-istifadə hallarına yol verməməlidir. Ölkə başçısının təbiri ilə desək, “kasıbların axırıncı puluna göz dikməməlidir, sahibkarlığın inkişafına maneçilik törətməməlidir”.

Parlament üzvü xüsusi olaraq qeyd edib ki, cənab Prezidentin korrupsiyaya qarşı mübarizə çərçivəsində apardığı qəti, prinsipial tədbirlər əhali tərəfindən yüksək qiymətləndirilir və dəstəklənir: 

“Qanun heç kimə xüsusi imtiyazlar vermir. Hər kəs qanun qarşısında bərabər hüquqa malikdir. Hamıya  məlumdur ki, bir çox məmurlar təhsili, peşəkarlığı daşıdığı vəzifəyə uyğun gəlməyən, özlərinə yaxın adamları himayədarlıq edərək ətrafına yığır və bununla korrupsiya ilə məşğul olurlar.

Bu da təbii olaraq, əhali arasında, ələlxüsus qabiliyyətli kadrlarda narazılığa səbəb olur. Bu baxımdan gənclərin rəhbər vəzifələrə təyin olunması cəmiyyətin yeniləşməsinə, saflaşmasına, sosial ədalət prinsiplərinin bərqərar olmasına xidmət edəcək”.