“Cəbhənin Goranboy istiqamətində düşmənin növbəti təxribatının qarşısının alınması və erməni komandirin əsir götürülməsi xalqımızı ürəkdən sevindirdi. Bu münasibətlə hər kəsi təbrik edirəm, qəhrəman əsgərlərimizə işğal altında olan ərazilərimizdə üç rəngli bayrağımızı dalğalandırmağı arzulayıram. 2016-cı ilin aprel döyüşlərində Cəbrayıl rayonunun Lələtəpə yüksəkliyi, sonra Naxçıvanın Günnüt kəndinin 11 000 ha. ərazisi azad olundu. İyul ayında isə Tovuz istiqamətində törətdiyi təxribatlara görə layiqli cavabını aldı”. Bunu SİA-ya millət vəkili Nəsib Məhəməliyev deyib.

Deputatın sözlərinə görə, qardaş Türkiyə Silahlı Qüvvələri ilə Ordumuzun birgə keçirdiyi irimiqyaslı döyüş təlimləri düşməni əməlli-başlı qorxuya salıb: “İndi isə, diversiya qrupu məhv edilməklə, komandirləri əsir götürüldü. Bu faktlar bir daha Azərbaycan ordusunun gücünü və Ali Baş komandanın əmrini dərhal icra etmək imkanlarını göstərdi.

Heç kimə sirr deyil ki, güclü, müasir silahlarla təchiz olunmuş, ən mürəkkəb döyüş taktikalarını mənimsəmiş ordunu formalaşdırmaq üçün inkişaf etmiş iqtisadiyyat, milyardlarla maliyyə vəsaiti lazımdır. Silahlı Qüvvələrin şəxsi heyətinin və ailə üzvlərinin sosial problemləri həll olunmalıdır. Ən müasir tələblərə cavab verən belə bir ordunun saxlanması isə, dövlətin iqtisadi gücünün nəticəsidir. Bütün bunların kökündə Azərbaycan Respublikasının Prezidenti İlham Əliyevin apardığı uzaqgörən siyasət durur. Əgər zamanında iqtisadi-sosial siyasətlə bərabər Silahlı Qüvvələrin inkişafına, bütövlükdə təhlükəsizlik sisteminin təkmilləşdirilməsinə fikir verilməsəydi, ölkəmiz çox ciddi problemlərlə qarşılaşa bilərdi. Azərbaycan xalqı öz ordusu ilə fəxr edir”.