"Prezident İlham Əliyev Rusiya prezidenti Vladimr Putinə, ermənilərin Tovuz istiqamətində törətdikləri cinayətlər və bundan sonra Rusiyadan göndərilmiş 400 ton silahlarla bağlı Azərbaycan xalqının narahatlığını ifadə edib".

Bunu Sonxeber.az-a danışan deputat Nəsib Məhəməliyev bidirib.

Deputat qeyd edib ki, reallıq ondan ibarətdir ki, Rusiya Federasiyasının bu mövqeyi ölkəmizə qarşı ayrı-seçkilik, qərəzli münasibətdir:

"Rusiya ATƏT-in Minsk qrupunun həmsədrlərindən biri olaraq, Azərbaycan-Ermənistan, Dağlıq Qarabağ konfliktində bitərəf mövqe sərgiləməli olduğu halda, əksinə davamlı şəkildə separatçıları silahlandırmaqla məşğuldur. Ermənilərin daim ruslara qarşı xəyanətkar siyasət aparmasına, arxadan zərbə vurmalarına baxmayaraq, ən çox hərbi dəstəyi Rusiyadan alırlar.
Yaxşı xatırlayırıq 90-cı illərdə 1 milyard dollarlıq silah və hərbi sursat Yeltsin hakimiyyəti tərəfindən Ermənistana təmənnasız verilib. Azərbaycana isə, dünya bazar qiymətləri ilə silah satılır.

Fərq ondadır ki, Ermənistan Rusiya vergi ödəyicilərinin hesabına silahlanır, Azərbaycan isə real maliyyə sərf edərək Rusiya iqtisadiyyatına xeyir verir. Şimal qonşumuz "balanslaşdırma" siyasəti aparmaqla hər iki ölkəni təsir altında saxlamaq istəyir. Ancaq görünən odur ki, nə qədər dəstək vermələrinə baxmayaraq, Paşinyan və erməni xalqı Rusiyaya düşmənçiliyini gizlətmir".

Deputat vurğulayıb ki, Azərbaycan isə, heç zaman Rusiyanın əleyhinə olan layihələrdə iştirak etməyib:

"Rusiya başa düşməlidir ki, belə siyasət aparmaqla iki ölkə arasındakı dostluq körpülərini yandırır. Azərbaycan əvvəlki geridə qalmış, zəif ölkə deyil, Azərbaycan Ordusu istənilən orduya qarşı vuruşmağa hazırdır. Xalq isə, bütövlükdə, Ordunun, Ali Baş komandan İlham Əliyevin arxasındadır. Müasir dünyada heç nəyi gizlətmək mümkün deyil. Hesab edirəm ki, Rusiya, eyni zamanda saxta müsəlman birliyindən danışaraq, ermənilərə qucaq açan əmmamə həvəskarları da Azərbaycana qarşı qeyri-səmimi siyasətlərindən əl çəkməlidirlər".