Dünya üçün ciddi təhlükə mənbəyinə çevrilən koronavirus pandemiyasına qarşı səmərəli mübarizə aparılan ölkələr sırasında Azərbaycan ilk yerlərdə qərarlaşır desək yanılmarıq. Virusun yayılmağa başladığı vaxtdan etibarən bu günə qədər görülən işlər, həyata keçirilən tədbirlər bunun əyani sübutudur. COVİD-19 pandemiyasına qarşı aparılan mübarizənin səmərəli, effektli olmasını şərtləndirən başlıca amil isə həyata keçirilən tədbirlərin birbaşa Azərbaycan Respublikasının Prezidenti Cənab İlham Əliyevin nəzarətində olmasıdır. Müntəzəm olaraq görülən işlərə nəzər yetirən dövlət başçısı bu günlərdə koronavirusa qarşı mübarizəyə həsr olunmuş müşavirə zamanı bir daha bu günə qədər həyata keçirilən tədbirləri təhlil etdi, müvafiq qurumlara öz tapşırıq və tövsiyələrini verdi.

Müşavirə dövlət başçısının bəzi qurumlara tutduğu iradlarla da yadda qaldı. Prezidentin fikirlərindən məlum oldu ki, hətta pandemiya zamanında da bəzi qurumlar, şirkətlər israfçılığa yol verir, əhəmiyyətsiz layihələr həyata keçirərək külli miqdarda vəsait mənimsəyirlər.

Prezidentin sədrliyi ilə keçirilən müşavirə, eləcə də dövlət başçısının səsləndirdiyi iradlar, həmçinin koronavirusa qarşı aparılan mübarizə və bu istiqamətdəki hazırkı vəziyyətlə bağlı Milli Məclisin deputatı Nəsib Məhəməliyevlə söhbətləşdik.  

-Nəsib müəllim, artıq bir neçə gündür ki, pandemiya səbəbindən tətbiq edilən bəzi karantin qaydalarında yumşalma edilib. Bu günlərdə bir deputat olaraq müşahidələriniz nədən ibarətdir, vətəndaşlarımız tətbiq edilən yumşalmaya məsuliyyətlə yanaşırmı?

-Aprel ayında yumşalmadan sonra yoluxanların sayında ciddi artımlar baş verdi. Düşünürəm ki, əhali daha çox maariflənmiş, məsuliyyətini artırmışdır. Ancaq dəniz kənarında, bəzi ictimai yerlərdə müşahidə etdiklərim müəyyən nigarançılıq doğurur. Hələ də kifayət qədər məsuliyyətsiz vətənfaşlarımız da vardır.

-Dövlət başçısı da bir neçə gün əvvəl koronavirusa qarşı aparılan mübarizəyə həsr olunmuş müşavirədə bu məqama toxundu və insanları qaydalara əməl etməyə, sosial məsafə saxlamağa çağırdı. Sizcə vətəndaşlarımız məsuliyyət hissini artıracaq, yoxsa ilk yumşalmadan sonra qarşılaşdığımız problemlə üzləşəcəyik.

-Təbii ki, ölkə başçısının hər belə çağırışlarının və göstərdiyi şəxsi nümunənin əhəmiyyəti çox böyükdür. Cənab Prezident koronovirusdan qorunmanın ən düzgün yolunu göstərir və hesab edirəm ki, bir çox vətəndaşlarımız məsuliyyətlərini artıracaq.

-Müşavirədən və koronavirusa qarşı mübarizədən söz düşmüşkən, Azərbaycan dövlətinin koronavirusa qarşı mübarizə istiqamətində gördüyü tədbirlər, atdığı addımları necə xarakterizə etmək olar?

-Ümumiyyətlə, pandemiyanın başlandığı andan Azərbaycan Prezidentinin qəbul etdiyi qəti qərarlar və qabaqlayıcı tədbirlər özünü doğrultmaqla yanaşı, bir çox ölkələr üçün nümunə oldu. Bunu dəfələrlə beynəlxalq təşkilatların və ayrı-ayrı dövlətlərin  rəhbərləri qeyd ediblər.

-Dövlət başçısının sözügedən müşavirədəki çıxışından aydın oldu ki, dövlət bundan sonra da pandemiyadan zərər çəkmiş insanlara, eyni zamanda sahibkarlara dəstəyi davam etdirəcək. Hər bir ölkə kimi, Azərbaycan iqtisadiyyatının da pandemiyadan zərər çəkdiyi bir vaxtda dövlətin öz dəstəyini davam etdirməsi zamanında ölkə iqtisadiyyatının düzgün istiqamətdə qurulduğundan xəbər vermirmi?

-Həmin müşavirədə ölkə başçısı  əhalini maraqlandıran bütün məsələlərə tam aydınlıq gətirdi. İlin əvvəlindən pandemiyaya görə iqtisadi fəallığın kəskin aşağı düşməsinə baxmayaraq, bütün nəzərdə tutulmuş sosial layihələrin icrasının təmin olunması aparılan siyasətin doğruluğunu təsdiq etmiş oldu. Eyni zamanda sahibkarlığın inkişafına göstərilən dövlət dəstəyinin davam etdirilməsi isə, gələcəyə hesablanmış addımdır.

-Azərbaycan dövlətinin, şəxsən dövlət başçısı İlham Əliyevin sosial siyasətini necə xarakterizə edərdiniz?

-Respublika Prezidenti İlham Əliyevin apardığı sosial siyasətin kökündə Azərbaycan vətəndaşının rifah halının yaxşılaşdırılması dayanır. Şəhid ailələrinə, əlillərə, məsburi köçkünlərə, imkansız ailələrə, tək-kimsəsizlərə göstərilən qayğı durur.  Hər il minlərlə mənzillərin, maşınların paylanması, müavinətlərin, təqaüdlərin artırılması, müalicə-bərpa məsələləri, o qəbildən olan tələbələrin dövlət tərəfindən təhsil haqlarının ödənilməsi dövlət başçısının gündəlik nəzarətində olan məsələlərdir. Sosial siyasət barədə danışarkən mütləq Birinci vitse Prezident, Heydər Əliyev Fondunun Prezidenti Mehriban xanım Əliyevanın xidmətlərini xüsusi vurğulamaq lazımdır. Bilavasitə sosial sahəyə rəhbərlik edən şəxs kimi, hörmətli Mehriban xanımın xidmətləri misilsizdir. Təkcə son iki ildə görülən qlobal işlər bunun bariz nümunəsidir və xalqımız tərəfindən ən yüksək şəkildə qiymətləndirilir.

-Bütün dünyanı bürüyən pandemiyaya baxmayaraq dövlət başçısının heç bir sosial layihənin dayandırılmayacağını bəyan etməsi Prezident üçün bu sahənin prioritet təşkil etdiyi qənaətini formalaşdırırmı?

-Prezidentin bu bəyanatı, dövlətin hər zaman öz vətəndaşının yanında olacağını göstərir və kifayət qədər özünə inamlı, özünü doğrultmuş, optimist bəyanatdır.

-Ancaq müşahidə etdiyimiz bir mənfi tendensiya da var ki, dövlətin, dövlət başçısının hər bir sahəyə dəstəyinə rəğmən öz işini məsuliyyətlə görməyən, israfçılığa yol verən müəyyən qurumlar, biznes strukturları var. Hətta dövlət başçısı müşavirədə çıxışı zamanı bir sıra hallarda bəzi qurumların lazımsız layihələr həyata keçirdiyini də bildirdi. Sizcə, bundan sonra həmin dairələr öz fəaliyyətlərində dönüş yaradacaqlarmı?

-Ölkə başçısının dövlət şirkətləri barədə səsləndirdiyi fikirlər tam həqiqəti əks etdirir və hesab edirəm ki, çox yaxın zamanda bu şirkətlər tənqiddən ciddi nəticə çıxaracaqlar. Bundan ötrü o şirkətlərin olduqca böyük potensialı vardır. Sadəcə ağıllı, şəffaf, korrupsiyadan uzaq effektiv menecmentin tətbiq olunması ilə vəziyyətdən rahat çıxmaq mümkündür.

-Bu arada son günlər artan Azərbaycan-Türkiyə əlaqələri, birgə hərbi təlimlər, Azərbaycanın yüksək səviyyəli hərbi və diplomatik rəsmilərinin qardaş ölkəyə səfərlərini necə dəyərləndirirsiniz və bu əlaqələrin inkişafı, Türkiyə rəsmilərinin, hətta prezident Ərdoğanın Qarabağla bağlı açıqlamaları işğalçı Ermənistana bir mesaj sayıla bilərmi?

-Dünyada və regionda gedən proseslər bu iki qardaş ölkə arasında hərtərəfli əməkdaşlığı zəruri edir. Hər iki nazirin Türkiyəyə səfərini müsbət qiymətləndirməklə yanaşı, hesab edirəm ki, gələcəkdə bütövlükdə türkdilli ölkələrin prosesə cəlb olunması istiqamətində intensiv iş aparılmalıdır. Son hadisələrdə Türkiyənin siyasi-hərbi-diplomatik rəhbərliyinin Azərbaycanın yanında olması həm Ermənistana, eyni zamanda onlara havadarlıq edənlərə ciddi mesaj oldu.