Son illərdə havaların quraqlıq keçdiyinə və ümumiyyətlə dünyada baş verən iqlim dəyişikliklərinə görə su qıtlığı yaranıb.

Bununla bağlı Sonxeber.az-a danışan deputat Nəsib Məhəməliyev bildirib.

Deputat qeyd edib ki, Azərbaycan Respublika Prezidenti İlham Əliyevin "su təsərrüfatında yaranmış" vəziyyətlə bağlı videoformat vasitəsilə keçirdiyi müşavirə aktual bir məsələyə həsr olunmuşdu:

"Bildiyiniz kimi, son illərdə havaların quraqlıq keçdiyinə və ümumiyyətlə dünyada baş verən iqlim dəyişikliklərinə görə su qıtlığı yaranıbdır. Əgər vaxtında qabaqlayıcı tədbirlər görülməsə, gələcəkdə ciddi problemlərlə rastlaşa bilərik. Bütün bunları nəzərə alan ölkə başçısı, aprel ayında xüsusi dövlət komissiyası yaratdı. Ötən müddət ərzində komissiya tərəfindən aparılan işlərə diqqət yetirdikdə, düşünürəm ki, bu sahədə aparılan işlər öz bəhrəsini verəcəkdir. Digər tərəfdən qeyd etmək lazımdır ki, cənab prezidentin son illərdə həyata keçirdiyi "Oğuz-Qəbələ-Bakı" su xətti, " Taxtakörpü" və "Şəmkirçay" su anbarları olmasaydı, indi hansı vəziyyətlə qarşılaşa bilərdik. Bundan əlavə Bakı şəhərində və respublikanın iki-üç rayonunu çıxmaqla, əksər yerlərdə içməli su, suvarma ilə bağlı çoxsaylı infrastruktur layihələri icra olunub. Yəni, bu məsələ ilə bağlı qlobal işlər görülüb.Təbii ki, bəzi yerlərdə müəyyən problemlər qalır və bu istiqamətdə lazımı işlər aparılır".

Deputat qeyd edib ki, Kürün suyunun aşağı düşməsi ilə bağlı Neftçalada kəskin su çatışmazlığı yarandığına görə, müşavirədə ölkə başçısı dərhal tapşırıqlarını verdi və icra olunmaqdadır:

"Digər regionlardada problemlərin həlli ilə əlaqədar və ümumiyyətlə gələcəkdə həm içməli, həm də suvarma sistemlərinin idarə olunması üçün tədbirlər planı hazırlanacaqdır. Texnogen problemlər, təbii fəlakətlər hər zaman, hər bir ölkədə baş verə bilər. Əsas odur ki, bu problemlərin həlli üçün dövlət qurumları lazımi tədbirlər görsün. Fakt odur ki, bəzi yerlərdə əhalini narahat edən su qıtlığı, dövlət başçısının şəxsi nəzarətindədir".

Aysel Yusifqızı