Xəbər verildiyi kimi, iyulun 24-də Azərbaycanın Birinci Vitse-prezident Mehriban Əliyeva Amerikanın Los-Anceles şəhərində və bəzi Avropa ölkələrinin paytaxtlarında yaxın günlərdə baş vermiş hadisələrlə bağlı həmvətənlərimizə müraciət ünvanlayıb.

Geniş müraciətdə Birinci Vitse-prezident beynəlxalq hüquq-müdafiə təşkilatlarına son olaraq Avropa və Amerikadakı Azərbaycan vətəndaşlarına qarşı ermənilərin xain hücumlarına münasibət bildirməyə çağırıb.

Sitat: "Mən, həmçinin çoxsaylı qeyri-hökumət təşkilatlarını, o cümlədən insan haqlarının müdafiəsini özlərinin missiyası elan edən "Freedom House", "Amnesty International" və "Human Rights Watch" təşkilatlarını törədilmiş hadisələrə ədalətli qiymət verməyə çağırıram. Lakin nədənsə biz hələ onların səslərini eşitmirik. Ümidvaram ki, bu qurumlar yetərincə prinsipiallıq nümayiş etdirərək ikili standartlar siyasətindən əl çəkəcək və faktlara əsaslanan bəyanatlarla çıxış edəcəklər".

Son baş verən hadisələr beynəlxalq insan haqları təşkilatları üçün ciddi sınaq, başqa sözlə, özlərini təsdiqləmək üçün fürsətdir. Azərbaycanda baş verən insan haqları ilə bağlı istənilən şikayətə operativ reaksiya verən, bu şikayərləri beynəlxalq platformalarda müzakirəyə çıxaran insan haqları təşkilatları indi dünyanın inkişaf etmiş ölkələrində yaşayan azərbaycanlılara qarşı ermənilər tərəfindən törədilən aşkar cinayətlərə də dərhal hüquqi qiymət verməli, zərər görən insanlar dəstəklərini təklif etməlidir. Ancaq hələlik bu qurumlardan məsələ ilə bağlı operativ reaksiya, fəaliyyət görünməyib.

Bununla bağlı Sonxeber.az-a danışan deputat Nəsib Məhəməliyev bildirib ki, Azərbaycan Respublikasının Birinci vitse-prezidenti Mehriban xanım Əliyevanın müraciəti iyul ayının 24-də Kaliforniyanın Los-Anceles şəhərində, Avropanın bəzi ölkələrində erməni daşnakları tərəfindən təşkil olunmuş təxribatlar və xain hücumlar nəticəsində soydaşlarımıza qarşı törədilmiş fiziki zorluqlara beynəlxalq birliyin diqqətini cəlb etmək məqsədi daşıyır. Eyni zamanda hörmətli Mehriban xanım, uzun illər Azərbaycana qarşı qərəzli, ermənipərəst mövqeləri ilə seçilən "Freedom House", "Amnesty İnternational" kimi təşkilatlara öz vəzifə borclarını yerinə yetirməyə çağırış etdi. Adı çəkilən təşkilatların bilavasitə vəzifə borcudur ki, dünyanın istənilən bölgəsində analoji hadisələrə obyektiv münasibət bildirsin. Ancaq təəssüflər olsun ki, həmişə olduğu kimi, bu dəfə də onlar ənənələrinə sadiq qalaraq, həqiqətin yanında olmadılar. Etiraf etməliyəm ki, Azərbaycan xalqı onlardan hansısa ədalət gözləmirdi. Çünki, bir milyon qaçqın və məcburi köçkünlərin taleyinə biganəlik göstərən, hansısa fərdi mülahizələrə görə dövləti sistemli şəkildə əsassız ittiham edən təşkilatlardan ədalətli mövqe gözləmək, sadəcə sadəlövhlük olardı. Bunun bir neçə səbəbi var. Dünyada mövcud olan geosiyasi maraqlar, artıq 100 ildən bəri oturuşmuş erməni diasporası və havadarları, ölkə daxilində fəaliyyət göstərən 5-ci kolon və düşmən dəyirmanına su tökən radikal müxalifət.
Deputat qeyd edib ki, bütün bunlara baxmayaraq, Azərbaycan xalqı, Silahlı Qüvvələrimiz, xaricdə yaşayan soydaşlarımız düşmənə harda olmasından asılı olmayaraq, lazımi cavablar verirlər:

"Azərbaycan artıq 90-cı illərin geridə qalmış xaotik ölkəsi deyil. Beynəlxalq nüfuzu olan, kifayət qədər inkişaf etmiş güclü dövlətdir. Siyasi, iqtisadi, maliyyə, sosial, təhlükəsizlik və digər problemlərin həll etmək iqtidarındadır. Təsadüfi deyil ki, ermənilərin törətdikləri ixtişaşlarda xəsarət almış soydaşlarımızın bütün xərcləri dövlətimiz tərəfindən qarşılanır. Dünyanın hansı ölkəsində yaşamasından asılı olmayaraq, hər bir soydaşımız bilməlidir ki, onun arxasında güclü Azərbaycan dövləti durur. Çox hörmətli Mehriban xanımın müraciətinin qayəsində bu amil durur. Hesab edirəm ki, olduqca zamanında edilmiş müraciətdir və tarixi əhəmiyyəti böyükdür. Dövlət vətəndaşının arxasındadır".

Aysel Yusifqızı