“Məkrli düşmən, Dünya Birliyi tərəfindən teror təşkilatı kimi tanınmış “ASALA”-nı proseslərə qoşdu. Son yüz il ərzində bu təşkilat çoxsaylı cinayətlər törətmişdir. Bu terror təşkilatını neytrallaşdırmaq istiqamətində türk qardaşlarımızın gözəl təcrübəsindən yararlanmağı öyrənməliyik”.
Bu fikirləri Bizimyol.info-ya xaricdə yaşayan soydaşlarımızın ermənilərlə lokal səviyyəli qarşıdurmalarına dair verdiyi açıqlamada deputat Nəsib Məhəməliyev səsləndirib.


Millət vəkili həmvətənlərimizin milli həmrəylik göstərişini təqdir edərək, eyni zamanda ehtiyatlı olmağa çağırıb.

“Ermənistanın, cəbhənin Tovuz istiqamətində törətdiyi təxribatlardan sonra, ordumuzun layiqli cavab verməsi, Azərbaycan xalqının yekdilliklə orduya dəstək verməsi olduqca müsbət haldır. Əvvəlki illərdən fərqli olaraq, bu dəfə Amerika Birləşmiş Ştatlarından tutmuş, Avropa ölkələrində, Rusiyada və dünyanın müxtəlif ölkələrində yaşayan soydaşlarımız milli həmrəylik nümayiş etdirirlər. Bu da ilik növbədə Azərbaycan xalqının çətin dövrlərdə, ümummilli məsələlər ətrafında birləşmək bacarığının göstəricisidir. Ən azından beynəlxalq ictimaiyyət, eyni zamanda düşmən gördü ki, Azərbaycan xalqı torpaqlarının işğalı ilə barışmaq niyyətində deyil, status-kvo dəyişməlidir. Əksinə, 30 il vaxt keçməsinə baxmayaraq, yeni gələn nəsillər Qarabağı unutmayacaqlar. Təəsüf ki, bəzi ölkələrdə soydaşlarımızın dinc nümayişlərinə, erməni daşnakları, təxribatla cavab verdilər. İlk növbədə diaspor təşkilatlarımız, təbii haqlarından istifadə edərək, sırf qanunları gözləməklə, nümayişlərini davam etdirməlidirlər. Düşmən tərəfindən gözlənilən bütün təxribatları nəzərə almalı, qabaqlayıcı tədbirlər görməlidirlər. Çünki məkrli düşmən, Dünya Birliyi tərəfindən teror təşkilatı kimi tanınmış “ASALA”-nı proseslərə qoşdu. Son yüz il ərzində bu təşkilat çoxsaylı cinayətlər törətmişdir. Bu terror təşkilatını neytrallaşdırmaq istiqamətində türk qardaşlarımızın gözəl təcrübəsindən yararlanmağı öyrənməliyik. Bir daha təkrar edirəm. Maksimum kortəbii, düşünülməmiş hərəkətlərdən uzaq olmalıyıq. İstənilən təxribata çəkilməyimiz, bizi əsas məqsədimizdən yayındıra bilər. İndiki halda Ermənistan torpaqlarımızın işğalını heç cür əsaslandıra bilmir. Ona görə də əllərinə başqa arqumentlər verməməliyk”.