Fevral ayının 9-da Milli Məclisə keçirilən növbədənkənar seçkilərin nəticəsi olaraq, müasir Azərbaycan tarixində ilk dəfə parlament və komitə rəhbərliklərində müxalifət partiyalarının nümayəndələri təmsil olundular.

Etiraf olunmalıdır ki, belə bir qeyri-standart addımın atılmasını heç kim gözləmirdi. Çünki parlament çoxluğunu, Yeni Azərbaycan Partiyası qazanmışdı və yuxarıda sadaladığım vəzifələrin tutulması üçün problem yox idi.

Ancaq Respublika Prezidenti, YAP-nın sədri cənab İlham Əliyev uzaqgörənliklə, parlament müxalifətini təşkil edən partiyaların nümayəndələrini, sədrin və komitə rəhbərlərinin müavini vəzifələrinə tövsiyə etməklə inqlabi addım atmış oldu.

Eyni zamanda, aparılan struktur islahatları çərçivəsində, Prezident administrasiyasının “Siyasi partiyalar və qanunvericilik hakimiyyəti ilə əlaqələr” şöbəsi yaradıldı. Qısa zaman ərzində, parlamentdən kənar siyasi partiyalarla işgüzar münasibətlər formalaşdırıldı və faktiki olaraq uzun illərin müzakirə predmetinə çevrilmiş iqtidar-müxalifətinin dialoqunun əsası qoyuldu. Hesab edirəm ki, cəmiyyətin bütün təbəqələrini özündə əks etdirən ictimai-siyasi qüvvələrin dövlət idarəetmə sisteminə, ümummilli məsələlərdə vahid platformadan çıxış etməsi müstəqilliyimizin daha da möhkəmlənməsinə, daxili sabitliyə xidmət edir. Hər zaman qardaş Türkiyədə gedən siyasi prosesləri izləyərkən, bir-birinə zidd ideologiyalara məxsus partiyaların ümummilli məsələlərdə yumruq kimi birləşməsinin şahidi olmuşuq. Bu baxımdan son günlərdə cəbhənin Tovuz istiqamətində baş vermiş erməni təxribatından sonra on minlərlə insanın əllərində Azərbaycan bayraqları ilə küçələrə axışması, minlərlə gəncin orduya yazılması, Ali Baş komandana, ordumuza verilən ən böyük dəstəkdir.

43 siyasi partiyanın birgə bəyanat qəbul edərək, 1-nömrəli problem olan, Qarabağ probleminin həlli istiqamətində ölkə Başçısı İlham Əliyevin yanında olduqlarını bildirdilər. Təkrar edirəm, belə bir bəyanatın qəbul olunması ölkəmizin tarixində ilk dəfədir. Ələlxüsus, müharibə şəraitində milli həmrəyliyin ən yüksək nümunəsi olmaqla, aparılan islahatların nəticəsidir.

Cəmiyyətin birləşdirilməsi istiqamətində atılan bütün addımlar xalqımız tərəfindən yüksək qiymətləndirilir və düşmənin arzularını puça endirir.

visiontv.az