Xəbər verdiyimiz kimi iyulun 12-də günorta saatlarından başlayaraq Ermənistan silahlı qüvvələrinin bölmələri Azərbaycan-Ermənistan dövlət sərhədinin Tovuz rayonu sahəsində atəşkəs rejimini kobud şəkildə pozaraq artilleriya qurğularından istifadə etməklə mövqelərimizi atəşə tutublar. Ermənistan tərəfinin törətdiyi təxribat nətıcəsındə Azərbaycan Ordusunun 4 hərbi qulluqçusu şəhid olub, 4-ü isə yaralanıb. Bu gün Ermənistan dövləti cəbhə ilə yanaşı sosial şəbəkələrdə təxribatlar törədir. Onlar Azərbaycan dilində saxta profillər açaraq guya şəhid sayının gizlədilməsi ilə bağlı yalan məlumatlar yayırlar. Onlar bizimlə heç bir əlaqəsi olmayan və köhnə foto, video yayaraq əhali arasında təşviş yaratmaq istəyirlər.

Bununla bağlı Sonxeber.az-a danışan deputat Nəsib Məhəməliyev bildirib ki, özünü azərbaycanlı hesab edən hər bir vətəndaş dərindən dərk etməlidir ki, müharibə təkcə cəbhə bölgəsində getmir: "Müharibə silahların tətbiq olunmasından əlavə diplomatik səviyyədə, informasiya sahəsində, iqtisadi və bir çox digər istiqamətlərdə aparılır. Ələlxüsus, dünyanın hər bir bölgəsinə səpələnmiş erməni kimi məkirli, hiyləgər, müxtəlif sifətlərə malik riyakar düşmənlə. Reallıq ondan ibarətdir ki, müasir dünyada gedən sivilizasiyalar arası mübarizənin fonunda erməni lobbisinə dəstək verən, ikili standartlardan çıxış edərək öz geosiyasi maraqlarını təmin edən kifayət qədər güclər mövcuddur. Bu təşkilatlanmış düşmənə qarşı müharibədə informasiya müharibəsinin dəqiq aparılması olduqca vacib məsələdir. Çünki birinci Qarabağ müharibəsində vahid komandanlığın olmaması, informasiya və psixoloji sahələrdə buraxdığımız səhvlər ölkəmizə baha başa gəlib. Ancaq indi Respublika Prezidenti, Silahlı Qüvvələrin Ali Baş Komandanı İlham Əliyevin rəhbərliyi ilə güclü, müasir texnikalarla təchiz edilmiş ordumuz vardır. 2016-cı ilin aprel döyüşləri və iyul ayının 12-13-də baş vermiş döyüşlər zamanı ordumuzun nəyə qadir olduğunu həm dostlarımız, həm də düşmən gördü. Bu qələbələrimizin davamlı olması, işğal altında olan torpaqlarımızın azad olunmasını istəyiriksə, düşmənin informasiya təxribatlarına uymamalıyıq. Bu tipli dezinformasiyalar düşmən tərəfindən həmişə olacaq və biz ona hazır olmalı, zamanında qarşısını almalıyıq. İkinci bir məsələ isə, ermənilərin yaydıqları şayiələri, videogörüntüləri paylaşmaq qətiyyən olmaz. Çünki düşmənin məqsədi Azərbaycan cəmiyyətində panika yaratmaq məqsədi daşıylr. Bu da müharibə aparan ölkə üçün qətiyyən yol verilməzdir. Azərbaycan xalqı bilməlidir ki, onun güclü ordusu var və bu ordu ən çətin tapşırıqların öhdəsindən gəlməyə qadirdir. Allah şəhidlərimizə rəhmət eləsin. Allah Azərbaycanımızı qorusun".

Aysel Yusifqızı