"Həqiqət gec-tez üzə çıxır. Nikol Paşinyan hələ hakimiyyətə gəlməmişdən İrəvan küçələrində təşkil etdiyi mitinqlərdə səsləndirdiyi daşnak lozunqları ilə faşistlərdən fərqlənmədiyini ortaya qoymuşdu. Hakimiyyətə gəldikdən sonra da öz sələflərinin siyasətini davam etdirməklə, faşizm ideyalarına sadiqliyini sübut etmiş oldu".

Bunu SİA-ya millət vəkili Nəsib Məhəməliyev deyib.

Deputatın sözlərinə görə, Paşinyan Hitlerin yaxın silahdaşı Qaregin Njdeyə ucaldılmış abidəyə haqq qazandırmaqla, faşizm qurbanı olan milyonlarla insanın qətliamına hörmətsizlik etmiş oldu: "İşğal olunmuş Azərbaycan torpaqlarının azad olunmaması və hər vəchlə danışıqlardan yayınması da, onun faşist ideyalarının daşıyıcısı olduğunu göstərdi. Üstəlik babasının II Dünya Müharibəsində mənfur general Njde ilə birlikdə dinc insanların qətlində iştirak etməsi ilə bağlı arxiv sənədlərinin aşkara çıxarılması isə onun genetik yaddaşı ilə bağlıdır. Nəvə XXI əsrdə də babasının yolunu gedir. MDB dövlət başçılarının Aşqabad sammitində Azərbaycan Prezidenti İlham Əliyev erməni faşizminin iç üzünü dünya birliyi qarşısında açdı. Ancaq qatı millətçi Nikol Paşinyanın erməni xisləti faşizm ideyalarını dəstəməklə öz kimliyini bir daha nümayiş etdirdi. Təəssüf ki, sivil dünyanın tam əksəriyyətinin faşizmə qarşı mübarizə apardığı bir vaxtda, hələ də erməni faşizmini dəstəkləyən qüvvələr vardır. Müasir siyasətdə geniş tətbiq olunan ikili standartlar bu məsələdə də tətbiq olunur. Dünyada haqqın, ədalətin bərqərar olmasını istəyən qüvvələr başa düşməlidirlər ki, faşistin yaxşı-pisi, bizimki, sizinki olmur. Faşist elə faşistdir. Paşinyanlar və digər yanlar kimi".