"Azərbaycan Prezidenti cənab İlham Əliyevin güclü siyasi iradəsi ilə başlanan yeni islahatlar, bir mənalı şəkildə xalq tərəfindən dəstəklənir. Etiraf etməliyik ki, hər kəs köklü islahatların aparılması zərurətini, əvvəlki qaydada davam etmənin cəmiyyətdə sosial ədalət prinsiplərinin pozulması, kəskin təbəqələşmə ilə nəticələnəcəyini dərk edirdi. Bir çox məmurların tutduğu vəzifələrdən sui-istifadə hallarına yol vermələri, tabeçiliyində olan insanlarla feodal təfəkkürlü davranışları, qəbul etdikləri qərarlarda dövlət mənafeyindən çox, şəxsi mənafelərini güdməkləri əhali arasında kütləvi narazılığa səbəb olurdu. Nəticədə, hansısa yerində olmayan təsadüfi məmurun yarıtmaz fəaliyyətinə görə vətəndaş dövlətdən narazı düşürdü".

Bunu SİA-ya millət vəkili Nəsib Məhəməliyev deyib.

Onun sözlərinə görə, cəzasızlıq şəraitində bu tipli məmurların sayı çoxalmaqla bərabər, ölkə başçısı tərəfindən aparılan sosial-iqtisadi islahatlara da maneçilik törədirdilər: "Təbii ki, uzun zaman belə davam edə bilməzdi və xalqın mənafeyinə zidd olmaqla bərabər, dövlət təhlükəsizliyi üçün də təhdid idi. Əsas qanunumuz olan konstitusiyaya uyğun olaraq dövlət başçısı, ölkədə gedən prosesləri əsaslı şəkildə təhlil edərək cəmiyyətin saflaşmasına, sosial ədalət prinsiplərinin, hüquqi dövlət quruculuğunun, demokratik dəyərlərin bərqərar olması üçün ciddi islahatlara start verdi. Belə bir deyim var; hər şey kadrlardan asılıdır. Bu baxımdan dövlət idarəetmə sisteminə savadlı, ictimai imici korlanmamış, peşəkar, əxlaqı, mədəniyyəti ilə seçilən yeni kadrların təyin olunması zamanın tələbidir. Son ayların təcrübəsi göstərir ki, bu praktika özünü doğruldur və əsasən yeni təyin olunmuş kadrlar, Prezidentin tapşırıqlarına riayət edərək sələflərinin neqativ təcrübələrini davam etdirmirlər. Ona görə də düşünürəm ki, islahatlar davam etməlidir. İstənilən islahat dərhal nəticə vermir. Ancaq indi atılan addımlar yaxın gələcəkdə mütləq müsbət nəticələr verəcəkdir".