"Ölkəmizdə ordu quruculuğu, Silahlı qüvvələrin Ali Baş komandanı İlham Əliyevin müəyyənləşdirdiyi strateqiyaya uyğun, ən yüksək hərbi standartları özündə əks etdirməklə aparılır".

Bunu Sonxeber.az-a danışan deputat Nəsib Məhəməliyev bildirib.

Deputat qeyd edib ki, ilk növbədə ordunun saxlanılması, ən müasir silahlarla,texnika ilə təchiz olunması üçün hər il dövlət büdcəsindən milyardlarla vəsait ayrılır: "Şəxsi heyətin döyüş qabiliyyətinin, peşəkar kadrların hazırlanması üçün NATO çərçivəsində, eyni zamanda müxtəlif ölkələrlə birgə hərbi təlimlər keçirilir. Beynəlxalq hərbi oyunlarla bağlı təşkil olunmuş yarışlarda iştirak edirlər. Təsdiq olunmuş qrafikə əsasən cəbhə bölgələrində, Silahlı Qüvvələrə məxsus ayrı-ayrı qoşun növlərinin birgə iştirakı ilə döyüş təlimləri keçirilir. Bizim gənc hərbçilərimiz müxtəlif hərbi sistemlərə malik ölkələrdə təhsil alırlar. Təbii ki, bütün bunlar ordunun döyüş qabiliyyətinin artırılmasına, ölkənin təhlükəsizliyi ilə əlaqədar qarşıya qoyulmuş vəzifələrin icrasına yönəlmiş addımlardır. Təsadüfi deyil ki, Azərbaycan ordusu bir çox göstəricilərinə görə hər il tərtib olunan dünyanın ən güclü əlli ordusu sırasında yer alır. Ordumuz 2016- cı ilin aprelində baş vermiş döyüşlər zamanı qısa müddətdə strateji cəhətdən yüksəklikdə yerləşən erməni ordusunu darmadağın etməklə, məğlubedilməz erməni mifini məhv etdi. Hər bir azərbaycanlı öz güclü ordusu ilə fəxr edir və ona güvənir".

Aysel Yusifqızı