Nazirlər Kabineti yanında Operativ Qərargahın hər gün yaydığı məlumatlarla tanışlıqdan belə görünür ki, Azərbaycanda koronavirus (COVID-19) infeksiyasına yoluxmaların sayında azalmalar var.

Aprelin 12-də yayılan məlumatda 40 yeni koronavirusa yoluxma faktının qeydə alındığı, 50 nəfərin müalicə olunaraq sağaldığı, evə buraxıldığı bildirilib. Bundan bir gün sonra yayılan məlumatda isə infeksiyasına 50 yeni yoluxma faktının olduğu, 39 nəfərin müalicə olunaraq sağaldığı, evə buraxıldığı qeyd olunub. Operativ Qərargahın bu gün yaydığı məlumatda isə bildirilib ki, 49 yeni koronavirus infeksiyasına yoluxma faktı qeydə alınıb, 62 nəfər müalicə olunaraq sağalıb və evə buraxılıb. Göründüyü kimi, xəstələnənlərin və sağalanların say göstəricisində ümumilikdə bir dalğalanma var. Amma hazırkı dövrədək ölkəmizdə 1197 nəfərin koronavirus infeksiyasına yoluxması faktı müəyyən edilib, onlardan 351 nəfəri müalicə olunaraq sağalıb, 13 nəfər vəfat edib, 833 nəfərin xüsusi rejimli xəstəxanalarda müalicəsi davam etdirilir. Həmin şəxslərdən 24 nəfərin vəziyyəti ağır, 28 nəfərin vəziyyəti orta ağır qiymətləndirilir, digərlərinin səhhəti stabildir. Ölkəmizdə müxtəlif karantin zonalarına yerləşdirilən 2300-dən artıq şəxsin müayinəsi ilə bağlı da müvafiq tədbirlər həyata keçirilir. Bu statistika və şərait bizə nə deyir? Bu göstəricilər nəzərə alınaraq, Azərbaycanda 24 mart 00:00-dan etibarən 20 aprel saat 00:00-dək elan olunan xüsusi karantin rejimi 6 gündən sonra uzadılmalı, yoxsa ləğv olunmalıdır?


Millət vəkili Nəsib Məhəməliyev mövzu ilə bağlı "Kaspi” qəzetinə açıqlamasında bildirib ki, Prezident İlham Əliyevin gündəlik nəzarəti və həyata keçirilən çoxşaxəli profilaktik tədbirlər nəticəsində koronovirusun ölkə ərazisində sürətlə yayılmasının qarşısı alınmaqdadır. Onun fikrincə, dünya ölkələrindəki vəziyyətə baxdıqda Azərbaycanda müsbət nəticələrlə bərabər, mənfi tendensiyalar da müşahidə edilməkdədir: "ABŞ-da, bizə yaxın olan Rusiya Federasiyasında, Türkiyə Cümhuriyyətində koronovirusa yoluxanların sayı artmaqdadır. Nəzərə alaq ki, son dövrlərdə bir çox soydaşlarımız xarici ölkələrdən vətənə gətiriliblər və karantin müddəti minimum 14, maksimum 28 gün təşkil edir. Koronovirusun özəlliyi ondan ibarətdir ki, bir nəfər xəstə qalsa belə, qısa vaxt ərzində bir neçə insanı yoluxdura bilir. Belə olan halda, mümkün riskləri aradan qaldırmaq üçün Nazirlər Kabineti yanında Operativ Qərargah karantin rejimini uzatmalı olacaqdır. Başa düşüləndir ki, karantin rejimi vətəndaşlarımızın illər boyu formalaşmış həyat tərzini pozub, rahatsızlıq gətirib. Ancaq bir az da dözmək lazımdır. Hər kəs başa düşməlidir ki, karantin rejiminin ləğvi hər bir vətəndaşın məsuliyyətindən asılıdır”.