Xəbər verdiyimiz kimi koronavirusa görə martın 3-dən 10-na kimi ali və orta məktəblərdə, eləcə də baxçalarda tədris dayandırılıb. Bir çoxları müəyyən müəssisələrin də müəvəqqəti olaraq fəaliyyətinin dayandırılmasını və bu il keçiriləcək Novruz şənliklərinə ehtiyac olmadığını söyləyirlər.

Bununla bağlı Sonxeber.az-a danışan deputat Nəsib Məhəməliyev bildirib ki, ali və orta məktəblərinin fəaliyyətinin müvəqqəti məhdudlaşdırılması profilaktik dizenfeksiya işlərinin aparılması ilə əlaqədardır: "Koronarvirusa görə təşvişə düşmək yox, gündəlik gigiyenik qaydalara riayət etmək və həkimlərin məsləhətlərinə qulaq asmaq lazımdır. Təbii ki, imkan daxilində insanların kütləvi toplandığı yerlərdən uzaq durmaq xəstəliyin sürətlə yayılmasının qarşısını alan amillərdəndir. Artıq bir neçə ölkədə kütləvi tədbirlərin keçirilməsi qadağan olunub. Heç bəyənmədiyim, son dövrlər kişilər arasında daha çox dəb halını almış öpüşmə məsələlərini də tərgitmək lazımdır. Müəssisələrin işini dayandırmasına ehtiyac yoxdur. Novruz bayramı ümumxalq bayramıdır. Düşünmürəm ki, novruz bayramına qədər virusun yayılması kütləvi hal alar. Bayram şənliklərini müəyyən normalar çərçivəsində keçirmək olar".