"TANAP Azərbaycan və Türkiyənin birgə iştirak etdiyi və xüsusi əhəmiyyət kəsb edən növbəti layihələrdən biridir. Bu kimi layihələr Azərbaycanla Türkiyənin dostluq-qardaşlığı, strateji müttəfiqliyini möhkəmləndirməklə yanaşı, həm də dünyaya bir əməkdaşlıq örnəyi təqdim etmiş olur". Bu fikirləri "OLAYLAR"-a millət vəkili Nəsib Məhəməliyev noyabrın 30-da Türkiyənin Ədirnə şəhərinin İpsala qəsəbəsində Trans Anadolu Təbii Qaz Boru Kəmərinin (TANAP) Avropa bağlantısının (Faza-1) açılış mərasiminə münasibət bildirərkən səsləndirib. Millət vəkili qeyd edib ki, ümummilli lider Heydər Əliyevin şah əsəri olan Bakı-Tbilisi-Ceyhanla yola çıxan bu əməkdaşlıq, strateji müttəiqlik, sonradan Bakı-Tbilisi-Ərzurum, Bakı-Tbilisi-Qars, TANAP, TAP kimi regional və beynəlxalq əhəmiyətli layihələrlə daha da möhkəmləndi: "Məlum olduğu kimi TANAP uzunluğu 3 500 km-dən artıq olan Cənub Qaz Dəhlizi layihəsinin əsas komponentlərindən biridir. Cənub Qaz Dəhlizi layihəsi Xəzərin Azərbaycan sektorunda yerləşən "Şahdəniz" qaz-kondensat yatağının istismarının ikinci mərhələsi çərçivəsində hasil ediləcək qazın boru kəmərləri ilə Türkiyə və Avropaya nəqlini nəzərdə tutur. TANAP-la yanaşı, "Şahdəniz-2" layihəsi, Cənubi Qafqaz Boru Kəmərinin Genişləndirilməsi, Yunanıstan, Albaniya və Adriatik dənizinin dibi ilə Cənubi İtaliyaya qədər uzanacaq Trans-Adriatik Boru Kəməri (TAP) Cənub Qaz Dəhlizinin əsas komponentləridir".

Millət vəkili qeyd edib ki, bu kimi layihələr Azərbaycanın Avropanın enerji təhlükəsizliyinin təminatında mühüm rol oynadığını bir daha ortaya qoyur və ölkəmizin regional və beynəlxalq əhəmiyyətini artırmış olur.